Ötən ilin sonunda başlanan bahalaşma dalğasının 2014-cü ildə də davam edəcəyi bildirilir. Ekspertlərin fikrincə, tezliklə qorxunc bahalaşma dalğası Azərbaycanı ağuşuna alacaq. 2013-cü ilin dekabrında baş verən benzin bahalaşmasından sonra indi də kommunal xidmətlərin, işığın, qazın və suyun qiymətinin artacağı vurğulanır. Fevralın 1-dən yeni bahalaşmaya start veriləcəyi söylənilir. 

Ekspertlər bildirirlər ki, bahalaşma tezliklə bütün sahələri əhatə edəcək və ölkəni ciddi bahalaşma dalğası bürüyəcək. Yəni ötən il baş verənlər bahalaşma dalğasının anonsudur. Artan qiymət səviyyəsi isə iqtisadiyyatın strukturunda başqa korreksiyalar doğuracaq. Digər mal və xidmətlərin qiymətlər də artacaq. 

Ekspertlərin fikrincə, ölkə iqtisadiyyatında növbəti bir bahalaşma dalğasının əsası qoyulub. Yeni dalğanın yaranması, sonra təsirlərinin daha da genişlənməsi gözləniləndir. Bahalaşma yalnız ərzaq, qeyri-ərzaq məhsullarını əhatə etməyəcək. Ölkədə həm tənzimlənən, həm tənzimlənməyən qiymətlərin hamısının artımına gətirib çıxaracaq. 

İqtisadçı ekspert Qadir İbrahimlinin sözlərinə görə, bu il bahalaşma qaçılmazdır və tezliklə baş verəcək: “2014-cü ilin dövlət büdcəsində kommunal ödənişlərin 85 faiz artımı nəzərdə tutulub. Bu, 2013-cü illə müqayisədə olan rəqəmdir. Bu da onunla bağlıdır ki, hökumət yeni qiymət artımına hazırlaşır. Yəni bu, təsdiqlənmiş plandır, ötən ilin sonu yanacağın qiyməti artırıldı, çox güman ki, növbəti mərhələdə elektrik enerjisinin, əhaliyə verilən təbii qazın və suyun qiyməti artırıla bilər. Bu üç kommunal xidmətin bahalaşacağı realdır. Başqa cür heç nə büdcə təşkilatlarında kommunal ödənişlərin həcminin 85 faiz artmasına səbəb ola bilməz. Bu, qiymət artımları hesabına reallaşdırıla bilər. Artımlar da dediyim kimi, əvvəldən nəzərdə tutulub. Ona uyğun da kommunal ödənişləri, ödəmələri artırıblar, 250 milyon manata yaxın artımdır. Bunun bir hissəsi təsdiqləndi, yanacağın qiyməti qaldırıldı. Növbəti mərhələdə də işıq, qaz və suyun bahalaşacağı gözlənilir. Artıq hökumətin mövqeyindən çıxış edən ekspertlər də bahalaşmanın anonsunu verirlər və bunun qaçılmaz olduğunu vurğulayırlar”.

Qeyd edək ki, Tarif Şurası həmişəki kimi, bahalaşma ilə bağlı xəbərləri təsdiqləmir. Qurumdan bildirilir ki, onlarda belə bir məlumat yoxdur. Ekspertlər isə qeyd edirlər ki, tezliklə əhali bir tərəfdən həm bahalaşan qiymətlərlə, bahalı bazarla üz-üzə qalacaq, həm də əhalinin gəlirlərinin də artımında ciddi daxili və xarici impulslar olmayacaq. Nəticədə ölkədə yoxsulluğun səviyyəsinə də bu, çox ciddi təsir edəcək. Eyni zamanda ölkədə işsizlik, əmək problemləri daha qabarıq formada özünü büruzə verəcək. Nəticədə əhali qrupları arasında daha çox yoxsulluq dərinliyi olan vətəndaşların sayı daha da artacaq. Bu, ümumilikdə ölkə iqtisadiyyatını bahalaşdırma mərhələsinə daxil edəcək. Bu artımlar eyni zamanda ölkədə inflyasiya təzyiqlərini gücləndirəcək. Beləliklə, yoxsulluğun artması, işsizlik və sosial sferaya neqativ təsirlər bu il ərzində özünü daha kəskin göstərəcək.

Musavat.com