"Türkiyə Hava Yolları” (THY) şirkəti Almaniyaya uçan sərnişinlərə xəbərdarlıq edib. Belə ki, bundan sonra sözügedən ölkəyə uçan sərnişinlər ev heyvanlarını özləri ilə apara bilməyəcəklər.
THY-nin rəsmi açıqlamasında deyilir ki, bu barədə ikinci qərar verilənə qədər Almaniya hökumətinin qərarı ilə sərnişinlərin salonda yaxud karqo yerində ev heyvanı aparması qadağan edilib. Almaniyanın belə bir qadağa qoymasına səbəb son zamanlar bu ölkəyə gətirilən ev heyvanlarının tibb kartlarında məlumatların əskik olmasıdır.
THY-nin belə bir qərar verməsinin ardınca Almaniyaya uçuşlar həyata keçirən digər aviaşirkətlər rəsmi Berlindən onlara hər hansı göstərişin gəlmədiyini qeyd ediblər.
Azərbaycan Hava Yolları (AZAL) QSC-nin mətbuat xidmətinin rəhbəri Paşa Kəsəmənski Axar.az-a açıqlamasında bildirib ki, AZAL-ın yalnız transfer sərnişinlərin təyyarəsinin göyərtəsində və yük bölümündə heyvanlarla Almaniyaya səyahət etmələri qadağan olunub:
"Məlumat üçün bildirmək istəyirik ki, İATA-nın (Beynəlxalq Hava Nəqliyyatı Assosiasiyasıyasının) aviaşirkətlərə tövsiyə etdiyi TİM (Travel İnformation Manual/ Səyahət məlumatı kitabçası) nəşrinin Almaniyaya dair (AZAL Berlinin Tegel hava limanına birbaşa müntəzəm uçuşlar həyata keçirir) təqdim olunan məlumatına əsasən, yalnız transfer sərnişinlərin təyyarənin göyərtəsində və yük bölümündə heyvanlarla Almaniyaya səyahət etmələri qadağandır. Digər hallarda heyvanların Almaniyaya daşınmasına dair qadağalar haqqında rəsmi məlumat "Azərbaycan Hava Yolları”na daxil olmayıb”.

Xəbərdən istifadə edərkən istinad etmək vacibdir.