FaktXəbər-in məlumatına görə, Qafqaz Müsəlmanları İdarəsində Suriyaya gedən azərbaycanlılarla bağlı keçirilən iclasda Şeyxülislam Allahşükür Paşazadə maraqlı bir ifadə səsləndirib. Şeyx konkret ad çəkməsə də, dövlət məmurlarını ittiham edib. 

“Bəzi məmurlar Azərbaycanda işləyib maaş alırlar. Onların övladları isə hansısa məzhəbə qoşulub dövlətə qarşı iş aparırlar.”

Burada maraq doğuran bir sıra məqamlar var. İlk olaraq Şeyxin “bəzi məmurlar” ifadəsində konkret olaraq ad çəkməməsi müəmmalıdır. Amma bunu QMİ sədri olaraq deyən Şeyx, əlbəttə, məsuliyyətli bir yükün altına girdiyinin fərqindədir. Şeyxin dini məsələlərdə öz fəaliyyətinin zəifliyini ört-basdır etməsi üçün bu ifadəni səsləndirməsi bir ehtimaldır. Amma bu, daha çox dövləti ittiham edən bir xarakter daşıyır. Sanki Şeyx əlində “konkret siyahı” olduğunu və bununla da dövlət məmurlarına əzələ nümayiş etdirdiyini büruzə verir. Eyni zamanda öz nüfuzundan istifadə edərək  birbaşa bu cür bəyanatlar veməsi və dövlət məmurlarının övlalarının vəhhabi olmasını yumşaq dillə ifadə etməsi daha çox şantaj xarakteri daşıyır. Amma eyni zamanda Şeyx bununla ölkədəki son vəziyyətə qarşı zəif fəaliyyətlənin dövlət strukturları tərəfindən tənqiq edilməsindən özünü sığortalamaq məqsədini güdür.

Qeyd edək ki, bu cür ittihamlar müxtəlif vaxtlarda müxtəlif adamlar tərəfindən səsləndirilsə də, konkret olaraq ad çəkən olmayıb. Görünür Şeyx də bu məsələdə güc nümayiş etdirməklə yanaşı ehtiyatı da əldən verməməyi üstün tutub.