"2017-ci ildə Sumqayıt Bələdiyyəsi tərəfindən ümumilikdə 604005 manat vergi yığılıb. Bunun 118 min 79 manatı əmlak vergisinin payına düşür".
Bu sözləri Xeberle.com-a açıqlamasında Sumqayıt Bələdiyyəsinin mətbuat katibi Vüsal Məmmədov deyib. O bildirib ki, bələdiyyə tərəfindən 11580 binadan 69485 AZN vergi yığılıb.V.Məmmədov vergi yığımında olan problemlərdən də söz açıb:
"Vergi yığımında əsas problemlərdən biri bu vergi növü ilə bağlı ictimaiyyətin kifayət qədər məlumatlı olmamasıdır. Bəzən Əmlak vergisini MİS-lər tərəfindən yığılan "Ev pulu” ilə qarışıq salırlar. Ancaq bunlar başqa-başqa ödənişlərdir. MİS-ə ödənilən xidmət haqqıdır, Bələdiyyələrə ödənilən isə əmlak vergisi. Milli Məclis 2014-cü ilin iyununda «Yerli (bələdiyyə) vergilər və ödənişlər haqqında» qanuna dəyişiklik edib. 2015-ci ilin yanvarın 1-dən yeni qanunun tətbiqinə başlanıb. Bundan əvvəl mülkiyyətçilər əmlakın ümumi dəyərindən 5 min manat çıxıb, yerdə qalan vəsaitin 0,1 faizi qədər vergi ödəyirdi. Qanundakı dəyişiklikdən sonra ödəniş mülkün ümumi sahəsinə görə aparılır. Ümumi sahədən 30 kvadrat metr çıxıb yerdə qalan sahənin hər kvadrat metrinə görə vergi ödənilir. Başqa sözlə, qüvvədə olan qanunvericiliyə görə, əmlakın dəyəri 5 min manatdan azdırsa, vergi tutulmur. Dəyər bu məbləği keçərsə, vergi binanın dəyərinin 0,1 faizini təşkil edir. Fiziki şəxslərin xüsusi mülkiyyətində olan binalara görə əmlak vergisi onların yerləşdiyi ərazinin bələdiyyəsi tərəfindən hesablanır. Ancaq demək lazımdır ki, əmlak vergisinin ödənişindəki problemlər, tutaq ki, 2015-ci ildəki qədər deyil. Sakinlər ödənişləri ötən il daha yaxşı yerinə yetiriblər".
Mətbuat katibi əmlak vergisinin ödəniş forması barədə də məlumat verib:
"Ödənişlər əvvəl "Beynəlxalq” bank və "Dəmirbank” vasitəsilə qəbul edilirdi. İkinci bank fəaliyyətini dayandırdığı üçün hazırda yalnız Beynəlxalq bank vasitəsilə ödəniş etmək mümkündür. Ancaq yaxın gələcəkdə bu ödənişlərin də terminallar vasitəsilə aparılması üçün işlər aparılır".
Hicranə İsmayılova
Xeberle.com
Xəbərdən istifadə edərkən istinad etmək vacibdir.
