Son vaxtlar nəqliyyatın hərəkətində intensivliyi təmin etmək və tıxac probleminin qarşısını almaq üçün atılan addımlardan biri də yeni parkomatların quraşdırılmasıdır. Lakin bəzi ərazilərdə qoyulan parkomatlar şəhər sakinləri tərəfindən birmənalı qarşılanmır və onların narazılığına səbəb olur. Belə yerlərdən biri də Sumqayıt şəhər Dəmiryolu Vağzalının yanında qoyulan parkomatdır. Bu halların yaşanması isə "parkomatlar harada qoyulmalıdır" sualını gündəmə gətirir. Ümumiyyətlə parkomatlar hansı meyarlara görə qoyulur? Parkomat qoyulan yerlərdəki qiymətlər nəyə əsasən müəyyənləşdirilir?

 

Xeberle.com olaraq parkomatların yerləşdirilməsi və qiymətləri ilə bağlı əvvəlcə rəsmi tərəfin mövqeyini öyrənməyə çalışdıq. Bunun üçün ilk olaraq Sumqayıt şəhər İcra Hakimiyyətinin mətbuat katibi Eyvaz Qocayevlə əlaqə saxladıq. E.Qocayev bildirdi ki, bu məsələ üzrə aidiyyəti qurum İcra Hakimiyyəti deyil, şəhər bələdiyyəsidir.

Biz də açıqlama almaq üçün Sumqayıt şəhər Bələdiyyəsinin mətbuat katibi Vüsal Məmmədova zəng vurduq, lakin V.Məmmədov bildirdi ki, bu məsələ onların da səlahiyyətində deyil. Onun sözlərinə görə, məsələ üzrə aidiyyəti qurum İcra Hakimiyyəti nəzdində yaradılan "Sumqayıt Nəqliyyat" MMC-dir.

Qurumun direktoru Xannı Rüstəmov ilə əlaqə saxlamağa çalışsaq da, həmişəki kimi o, dəstəyi qaldırmadı. Əzmimizi qırmadan onun müavini Fərhad müəllimə zəng etdik, lakin yenə də heç bir nəticə əldə edə bilmədik və beləliklə də, rəsmi tərəfin münasibətini öyrənmək arzumuz ürəyimizdə qaldı.

Nəqliyyat mütəxəssisi Eldar Baxşıyev isə məsələyə münasibət olaraq bildirdi ki, şəhərin hansısa bir ərazisində qoyulan parkomatlar sakinlərin narazılığına səbəb olursa, həmin parkomatların qeyd olunan ərazilərdə qoyulması düzgün deyil: "Parkomatlar bir cərgə ilə, sıxlıq olan yerlərdə, nəqliyyat vasitələrinin intensiv hərəkətinə əngəl yaratmamaq şərtilə qoyula bilər. Sumqayıt şəhər Dəmiryol Vağzalında olan parkomat məsələsinə gəldikdə isə, qeyd edim ki, istənilən bir ərazidə olan yol nişanı əhalinin, kütlənin razılığı ilə qoyulmalıdır. Onu da bildirim ki, avtomobillərin parklanmasına görə ödənişin edilməməsi və ya parklanma yerindən ödəniş edilmiş müddət bitdikdən sonra əlavə ödənişin edilməməsi, habelə nəqliyyat vasitəsinin 24 saatdan artıq parklanma yerində saxlanılması ilə əlaqədar inzibati xəta hadisəsi nəzərdə tutulur. Qanunvericiliyə əsasən, 24 saatlıq müddət başa çatandan sonra avtomobil sahibinə məlumat verilməlidir. 3.5 tondan ağır yük avtomobilləri parkomat nişanı olsa belə orada dayana bilməz. 15 dəqiqəlik müddət ərzində parkomat qoyulan yerlərdə parklanmaya görə pul ödənilməməlidir”.

Mütəxəssisin də sözlərindən belə məlum olur ki, Sumqayıt şəhər Dəmiryol Vağzalında olan parkomatın qoyulması məqbul sayılmır. Ümidvarıq ki, müvafiq qurumlar bu məqama tezliklə reaksiya verər.

Məlumat üçün bildirək ki, parkomatların quraşdırıldığı dayanacaqlarda qiymətlər bir saat üçün 30 qəpik, iki saat üçün 60 qəpik, 4 saatadək 90 qəpik. 4 saatdan 8 saatdək isə 1 manatdır.

 

Elnarə Salamova

Xeberle.com

 

 

 

 

 

Xəbərdən istifadə edərkən istinad etmək vacibdir.