Son dövrlər 10-15 yaş arası uşaqların psixoloqa müraciəti artıb. Bu yaş uşaqların əksəriyyətinin problemi valideynlə ünsiyyətdə çətinlik, valideynlərin qoyduğu qadağalardır. Ona görə uşaq intiharlarında diqqət edilməli məqam uşağın valideynləri ilə olan münasibətidir.
Bu sözləri Axar.az-a açıqlamasında psixoloq Könül Telmannqızı Zaqatalada 11 yaşlı Hafiz Məmmədovun özünü asaraq intihar etməsi ilə bağlı danışarkən deyib. Psixoloq hesab edir ki, əgər 11 yaşlı uşağın intiharında bu hadisənin cinayət olmamasına dair sübut varsa, bu zaman valideynlər daha diqqətli olmalıdır. Uşağın son günlər hərəkət və davranışlarına əsasən intihar səbəbini tapmaq olar:
"O yaş dönəmində xüsusilə oğlan uşaqlarında psixoloji problemlər yaranır. Valideynlə bir balaca sözü üst-üstə düşməyəndə, özlərinə qapılmağa başlayırlar. Əsas valideyn-övlad münasibətidir. Bəlli yaş həddinə qədər valideynlər bunu nəzərə almalıdır. Hər uşaq eyni deyil. Valideynlər uşaqları ilə münasibət qurarkən fərdi şəkildə yanaşmalıdırlar. Uşağın xarakterinə əsasən münasibət qurmalıdırlar.
11-14 yaş arası uşaqların beynində oyanıqlıq başlayır. Bu dövrdə valideynlər uşaqlarla tez-tez ünsiyyətə girməlidir. Bu yaşda uşaqlar özlərinə də çox suallar verir. Həssas uşaqlar özlərinə verdikləri suallara cavab tapmayanda, özlərinə qapılırlar. Bu yaşda uşağın valideyndən gözləntisi də çox olur”.
Psixoloq əlavə edib ki, diqqətli valideyn uşağının adi göz kontaktından onun problemli olub-olmadığını müəyyən edə bilir:
"Daxili sıxıntısı olan uşaq evdə bunu mütləq büruzə verir və diqqətli valideyn bunu hiss edə bilir. Ancaq araşdırma heç bir problem olmadığını sübut edirsə, problemi evin içində və ya valideyn münasibətində axtarmaq lazımdır”.
K.Telmanqızı deyib ki, bu yaşda olan uşaqların intihar səbəbi ailə münasibətidir:
"Mənə 2 yaşdan yuxarı uşaqlar müraciət edir. Son dövrlər 10-15 yaş arası uşaqların müraciəti artıb. Əksəriyyətinin problemi isə valideynlə ünsiyyətdə çətinlik, valideynlərin qoyduğu qadağalardır. Bu səbəbdən bildirirəm ki, öncə evdəki münasibətə fikir vermək lazımdır. Olduqca nümunəvi uşaq belə intihar edə bilər. Nümunəvi olsa belə, valideyn onu başa düşmədiyi, övladı ilə ünsiyyət qura bilmədiyi və ya qurmadığı üçün uşaq intihara əl ata bilər”.
Uşaq həkimi, pediatr Vaqif Qarayev isə hesab edir ki, səbəb yox, problemdən çıxış yolu axtarılmalı, qarşısının alınması üçün addım atılmalıdır:
"Adətən uşaq və yeniyetmələrin intiharlarlnda ilkin səbəb kimi heç nə göstərilmir. Bəzi ruhi xəstələr istisna olmaqla.
Bir qayda olaraq valideynlər də, məktəb də intihar edənin davranışını, tərbiyəsini, təhsilini pozitiv qiymətləndirir. Ailə istəmir uşağı haqqında pis fikir formalaşsın, məktəb öz imicini qorumağa çalışır. Amma intiharlar davam edir. Belə olmur axı. Ciddi problemləri gizlətməklə biz uşaqları intiharlara sürükləyirik”.
Qeyd edək ki, Zaqatala rayon Muxak kənd sakini, 2007-ci il təvəllüdlü Hafiz Nazim oğlu Məmmədovun meyiti yaşadığı evin həyətində təndirin çardağında ipdən asılı vəziyyətdə aşkarlanıb.

Xəbərdən istifadə edərkən istinad etmək vacibdir.