Mircabar Sultanov 09 mart 1938-ci ildə Xaçmaz rayonunun Ləcət kəndində anadan olmuşdur. 1959-cu ildə Sumqayıt Elektrik Mərkəzinə təyinatla gələndə gənclik şəhəri Sumqayıt özünün 10 illik yubileyinə hazırlaşırdı. O vaxtı müəssisəyə, əsrə bərabər ömür sürmüş, Sumqayıtın fəxri vətəndaşı adı almış Əli Mustafayev rəhbərlik edirdi. İlk vaxtlardan işə yaradıcı münasibəti və ictimai fəallığı ilə fərqlənən gənc energetik öz bilik və bacarığı sayəsində irəli çəkilmiş, kollektiv arasında böyük hörmət və nüfuz qazanmışdır. Əvvəlcə İEM komsomol təşkilatının katibi və şəhər komsomol komitəsinin büro üzvü seçilmiş, əməli fəaliyyəti ilə etimadı doğrultmağa çalışmışdır. 1964-ci ildə komsomolçu gənclərdən ibarət keçmiş SSRİ ölkə nümayəndə heyəti tərkibində Hindistanda səfərdə olmuşdur. 1965-ci ildə İEM partiya komitəsinin katibi, 1969-76-cı illərdə müəssisə həmkarlar ittifaqı komitəsinin sədri işləmişdir. 1976-2002-ci illlərdə İEM-də rəhbər vəzifələrdə çalışan Mircabar Sultanov bütün qüvvə bacarığını istehsalatın normal fəaliyyət göstərməsinə sərf etmiş, fəal ictimaiyyətçi, gənclərin hami tərbiyəçisi kimi tanınmışdır. Fədakar əməyinə görə "SSRİ energetika əlaçısı" adına layiq görülmüşdür.

Sumqayıt şəhəri də Mircabar Sultanovun taleyində silinməz izlər qoymuşdur. O, şəhərin ictimai-siyasi həyatında fəal iştirak etmişdir. O, dəfələrlə Sumqayıt şəhər sovetinə deputat seçilmişdir. 2002-ci ildə təqaüdə çıxdıqdan sonra da ictimai fəaliyyətini davam etdirmiş şəhər ağsaqqalar şurasının üzvü, məhəllə komitəsinin sədri olmuşdur. Gözləri qarşısında inkişaf etmiş Sumqayıtımızı daha abad, daha gözəl görmək arzusu ilə yaşamışdır.

Lakin ömür vəfa etmədi. 2005-ci ildə 67 yaşında aramızdan gedən Sultanov Mircabar Nəbi oğlu həmkarlarının, dostlarının, yaxınlarının xatirəsində əməlisalehliyi, dostluqda etiibarlılığı, qayğıkeşliyi, işinə, vəzifəsinə yüksək məsuliyyət hissi ilə yanaşmağı ilə qalmışdır.

Xeberle.com