Bu gün Sumqayıtda Dövlət Təhlükəsizliyi
Xidməti əməkdaşlarının peşə bayramları qeyd edilib. Əvvəlcə DTX Sumqayıt şəhər
idarəsinin əməkdaşları peşə bayramı münasibətilə Heydər Əliyev parkında Azərbaycanın
təhlükəsizlik orqanlarının əzəli fəxri rəhbəri, bu mühüm dövlət təsisatında
milliləşmə prosesinin banisi Ümummilli Lider Heydər Əliyevin əziz xatirəsini
yad edib, abidəsi önünə gül qoyublar.
Sonra Heydər Əliyev Mərkəzində ümummilli
liderin həyat və fəaliyyətini əks etdirən videomateriallar, fotoşəkillər,
interaktiv lövhələrə baxış olub.
Bildirilib ki, 1919-cu il martın 28-də
Azərbaycan Demokratik Respublikası Hərbi Nazirliyinin Baş Qərargahı nəzdində kəşfiyyat
və əks-kəşfiyyat bölməsinin yaradılması ilə təməli qoyulan təhlükəsizlik
orqanları şərəfli inkişaf yolu keçib. Tədbirdə 1956-1965-ci illərdə ulu öndər
Heydər Əliyevin Dövlət Təhlükəsizliyi Komitəsində əvvəlcə əks-kəşfiyyata,
1967-ci ildən isə Komitəyə rəhbərliyi zamanı həmin xidmət orqanlarının keyfiyyətcə
yeni mərhələyə qədəm qoyduğunu, milli dövlətçiliyi və maraqları mühafizə edən
struktura çevrildiyini, burada çalışan milli kadrların sayının qısa müddətdə əhəmiyyətli
dərəcədə artırıldığını xüsusilə qeyd olunub.
Sonda xatirə şəkli çəkdirilib.
Xatırladaq ki, Ümummilli Lider Heydər
Əliyevin 1997-ci il mart ayının 23-də imzaladığı sərəncamla hər il mart ayının
28-də Azərbaycan Respublikasının təhlükəsizlik orqanlarının əməkdaşları öz peşə
bayramlarını qeyd edirlər. Bu gün Azərbaycanın təhlükəsizlik orqanlarının
yaranmasının 99-ci ildönümüdür.
Xeberle.com
Foto: Xeberle.com
Xəbərdən istifadə edərkən istinad etmək vacibdir.
