Xeberle.com olaraq "Sumqayıtın fəxri vətəndaşlarını tanıyaq” rubrikasına davam edirik. Bu dəfə haqqında bəhs edəcəyimiz fəxri vətəndaş Aslan Osmanovdur. O, həm də Sosialist Əməyi Qəhrəmanıdır.

Aslan Abdulla oğlu Osmanov 1925-ci ildə İsmayıllı rayonunun Culyan kəndində anadan olub. O, 1944-1945-ci illərdə İsmayıllı rayonunun bir sıra gəncləri ilə birgə səfərbərliyə alınaraq Sumqayıta göndərilib. A.Osmanovun ilk əmək fəaliyyəti "Zaqafqaziya sənaye-tikinti" trestindən başlayıb. 1946-cı ildə sözügedən gənclərin içərisindən bənna briqadası təşkil edib 2-ci Tikinti-Quraşdırma İdarəsinin sərəncamına verildiyi zaman nəinki respublikamızdan, hətta sovetlər ölkəsinin hər yerindən işçi qüvvəsi səfərbər edildi. 1947-ci ildə işə ola sevgisini, əl qabiliyyəti nəzərə alınaraq o, briqadir vəzifəsinə təyin edilib. 1948-ci ildə onun briqadası Sintetik Kauçuk Zavodunun tikintisinə göndərilib . Həmin ərəfədə onun briqadası komsomolçu-gənclər briqadası adlanırılmağa başlanılıb. 1949-cu ildə o, Bakıya, bənnalar arasında keçirilən yarışa göndərilib. O, öz ustalığı, bacarığı, qabiliyyəti və sürətilə bu yarışın qalibi seçilib. Onun bu hünəri barəsində respublikanın bir sıra mətbuat orqanı ilə yanaşı, "Komsomolskaya pravda" qəzetində də böyük məqalə dərc olunub. 1950-ci ildə təcrübəsi və səmərəli fəaliyyəti nəzərə alınaraq briqada "Mənziltikinti İdrəsi"nə göndərilib. A.Osmanov 50-ci illərdə "Əməkdə fərqlənməyə görə", "Rəşadətli əməyə görə", "Lenin yubiley" medallarına layiq görülüb və bir sıra mötəbər iclasların iştirakçısı olub. 9 avqust 1958-ci ildə ona "Sosialist Əməyi Qəhrəmanı" fəxri adı verilib və "Qızıl Ulduz" nişanı ilə təltif edilib. Sumqayıtda A.Osmanovun briqadası tərəfindən bir sıra sənaye və tikinti müəssisələri,yaşayış binaları, ictimai obyektlər, C.Cabbarlı, N.Nərimanov, Energetiklər, İnşaatçılar, S.Vurğun adına mədəniyyət sarayları, "Rossiya Kino Teatrı" və s. tikilib. O hətta 50-ci illərin ortalarında keçmiş Lenin küçəsindəki (indiki Azərbaycan prospekti) 2-ci məhəllədə yaşadıqları binanı da özü tikib. A.Osmanov 1969-cu ildə Sumqayıtın fəxri vətəndaşı adına layiq görülüb. O, 26 yanvar2002-ci il tarixində vəfat edib.

Qeyd edək ki, A.Osmanov dəfələrlə Sumqayıt şəhər Sovetinin IV-V çağırış respublika Ali Sovetinin deputatı seçilib, Sovet İttifaqı Kommunist Partiyasının XXI qurultayında Azərbaycan nümayəndələrinin sırasında olub.

Elnarə Salamova

Xeberle.com

Mənbə: "İnsan və təbiət" qəzeti