Bu gün "ADA" Universitetində 2016-cı il aprel döyüşlərinin qəhrəmanı, şəhid polkovnik-leytenant Raquf Orucovun anım mərasimi keçirilib.
Toplantıda şəhidin oğlu, "ADA"nın tələbəsi Aqşin Orucov çıxış edib.
Xeberle.com onun çıxışını olduğu kimi təqdim edir.
"Hörmətli qonaqlar, dəyərli "ADA" icması,
Mənim üçün bu tribunadan bugünkü tədbirdə çıxış etmək həm qürurvericidir, həm də məsuliyyətli. Mən dünyaya bir hərbçi, kəşfiyyatçı oğlu olaraq gəldim. Uşaqlığım sərhəd bölgələrində, hərbçilərin əhatəsində keçdi. Düşmənə nifrət hissi ilə böyüdüm. Çünki dünyanı dərk etdiyimdən mənfur ermənilərin mənim nənəmi şəhid etdiklərini bilirdim. Bəli, mənim atam Raquf Orucov öz doğma torpağında amansızcasına öldürülmüş bir ananın oğlu idi. Məhz bu səbəbdən bizim ideallarımız, həyat tərzimiz, dəyərlərimiz fərqli idi. Atamın peşəkar hərbçi olmasının kökündə işğal edilmiş torpaqlarımızın azadlığı yanğısı ilə yanaşı, bir ana həsrəti də dururdu. Dəyəri və əvəzi heç bir sərvətlə ödənilməyəcək həsrət!
Mən cəbhə bölgəsinin çətin şəraitində böyüdüm, amma heç vaxt şikayət etmədən. Çünki atamla fəxr edirdim. Hər gecə onu qoruması üçün Allaha dualar edirdim. Orta məktəb illərində Sumqayıt şəhərinə qayıdası olduq. Atam isə cəbhə bölgəsində xidmət keçirdi. Hələ 3-cü sinifdə oxuyanda inşa müsabiqəsində "Mənim ən böyük arzum” mövzusunda fikirlərimi bildirdim. O zaman ən böyük arzum bu müharibənin bitib, torpaqlarımızın azad olunub, atamın evə sağ-salamat qayıtması idi. Mən hər gün onun yolunu nigarançılıqla gözləməkdən usanmışdım. O zaman bu inşaya görə mükafata layiq görüldüm. Amma heç fikirləşmədim ki, mən bir gün şəhid komandirin oğlu olaraq tanınacam.
Atam vətənsevər, ciddi hərbçi olmaqla yanaşı, eyni zamanda tələbkar bir ata idi. Mənim və qardaşımın təhsili onun üçün çox önəmli idi. Həmişə məndən yüksək nəticələr gözləyirdi. Hələ mən 9-cu sinifdə oxuyarkən məndən "ADA" Universiteti haqqında soruşdu. İş yoldaşının oğlu bu universitetə qəbul olunmuşdu. Mənə də yaxşı hazırlaşıb "ADA" Universitetinə qəbul olunmağımı tövsiyə edirdi. Hətta şəhidliyindən iki gün qabaq zəng edərək, anama mənim təhsilimə diqqətli yanaşmağımı tapşırmışdı.
2016-cı il aprelin 4-ü mənim həyatımı tamamilə dəyişdirdi. Atamın şəhidliyi mənim bir gecədə böyüməyimə, həyata başqa mövqedən baxmağa sövq etdi. Mən artıq şəhid polkovnik-leytenant Raquf Orucovun oğlu idim. Bu adın məsuliyyəti, ağırlığı, mənim qarşımda yeni məqsədlər qoydu. Yaşadığım itkiyə, faciəyə baxmadan özümü toparlayıb atamın istəyini yerinə yetirməli idim. Çətin oldu, amma sonunda bacardım, bu sınaqdan üzüağ çıxdım. Hazırda mən "ADA" Universitetinin tələbəsiyəm.
Atam Raquf Orucov düşmənlə səngərdə, əsgərlərinin önündə döyüşərək, Vətən torpağının azadlığı uğrunda canından keçdi. Mənə isə fəxr ediləsi, qürur duyulası bir soyad bəxş etdi. Bu Vətən torpağının üzərində başıdik, qürurla gəzə biləcəyim bir soyad... Çünki mənim atam "Öncə Vətən” deyərək , canından, ailəsindən, vəzifəsindən vətən eşqi uğrunda vaz keçdi. Mən onun əqidəsini şərəflə, vicdanla daşımağa vətənim Azərbaycana layiqli övlad olmağa, dövlətimi beynəlxalq səviyyədə təmsil etməyə var gücümlə çalışacağam.. Vətən bizim əmanətimizdir. Şəhidlərimizin bizə verdiyi bu qanla suvarılmış Vətən torpağına layiqli vətəndaş olmağa çalışacağam. Ruhun şad olsun, cənab komandir!..”.
Xəbərdən istifadə edərkən istinad etmək vacibdir.
