Baş nazirin müavini gəncləri Suriyada yox, Qarabağda döyüşməyə çağırdı

 “Azərbaycan müharibəyə hazırdır. Eyni zamanda ermənilərin təxribatları əsasında atəşkəslə bağlı baş verən hadisələr və onların nəticələri də Azərbaycanın müharibəyə hazırlığının yüksək səviyyədə olduğundan xəbər verir”.

 Bunu jurnalistlərə açıqlamasında baş nazirin müavini Əli Əhmədov söyləyib.

 Onun sözlərinə görə, erməni tərəfinin, erməni şərhçilərinin reaksiyaları da bunu təsdiq edir: “Güman edirəm ki, Azərbaycanın cəbhə xəttində mövqelərinin möhkəmləndiyini dərk etməsi və öz ölkələrində daxili narazılıqların artması ilə əlaqədar olaraq cəmiyyətin daxili narazılıqlardan diqqətini yayındırmaq üçün cəbhə xəttində provokasiyalar törətməyə çalışırlar. Azərbaycan bu provokasiyalara layiqincə cavab verib. Ancaq cavab vermək daha çox Azərbaycanın hərbi qüdrətinin kifayət qədər yüksək olduğunu nümayiş etdirməkdən gedir. Bu, Azərbaycanın torpaqlarını azad etməyə hazır olduğunun bir nümayişi oldu”.

 Əli Əhmədov Azərbaycan gənclərinin Suriyada müharibəyə cəlb olunmasına da münasibət bildirib.

 Ə. Əhmədov deyib ki, gənclərin Suriyada hansısa ideyalar uğrunda döyüşməsinə müsbət baxmır: “Gənclərimiz işğal altındakı torpaqlarımızın azadlığı uğrunda mübarizəyə hazır olmalıdırlar”.

/apa.az/