Azərbaycanda yüksək vəzifələr tutan məmurların, tanınmış simaların övladları ilə bağlı məlumatlar tez-tez media vasitəsilə gündəmə gəlir, kimisi haqda yaxşı sözlər danışılır, kimisi barədə isə əksinə... 
Cəmiyyətin bütün təbəqələri kimi, vəzifəli şəxslərin, məşhurların övladları arasında nümunəvi davranışları ilə seçilənlər də var və təbii ki, bunun əksinə olanlar da... Ümumiyyətlə məmurların və məşhurların övladları haqqında bilgilər ictimaiyyətə də həmişə maraqlı gəlib - onlar kimdirlər, harda çalışır, nə işlərlə məşğuldurlar...

Modern.az saytı “Məşhurların övladları” adlı rubrikasında ictimai, siyasi xadimlərin, mədəniyyət, ədəbiyyat, idman və digər sahələrdə tanınmış simaların övladları haqda bilgilərin təqdimatını davam etdirir. 

Budəfəki təqdimatımız Azərbaycanın sabiq maliyyə naziri Əvəz Ələkbərovun oğlu Elnur Ələkbərov barəsindədidr. 

Qeyd edək ki, 1993-cü ildə Azərbaycanda hakimiyyət dəyişikliyi baş verəndə və Heydər Əliyev hakimiyyətə gələndə Ə.Ələkbərov Azərbaycan Respublikası Dövlət Sosial Müdafiə Fondunun sədri vəzifəsində işləyirdi. Heydər Əliyevin komandasında təmsil olunan Ə.Ələkbərov 1999-cu ilə kimi Dövlət Sosial Müdafiə Fondunun sədri postunda qaldı. O, ilk sosial sığorta haqqında qanunun müəlliflərindən biridir. Çoxsaylı dövlət və hökümət komissiyalarının üzvü olub.
1999-cu ilin iyulunda mərhum prezident onu maliyyə naziri vəzifəsinə təyin etdi. Ə.Ələkbərov bu vəzifədə 2006-cı ilin aprelinə qədər çalışdı. 
2006-cı ildə istefaya göndərilən iqtisad elmləri doktoru Əvəz Ələkbərov hazırda işsizdir. O, YAP Nəsimi təşkilatının İdarə Heyətinin üzvüdür.
Əvəz Ələkbərovun iki oğlu var.

Elnur Əvəz oğlu Ələkbərov 1984-cü il mart ayının 30-da Bakı şəhərində anadan olub. Orta təhsilini 1990-cı ildən Bakı şəhəri 20 nömrəli məktəb-liseyi və Oksford şəhəri Abakus Kollecində alıb. 2006-cı ildə Böyük Britaniyanın Oksford Bruks Uniersitetinin Biznes və beynəlxalq maliyyə üzrə balakavr, daha sonra Azərbaycan Dövlət İqtisad Universitetində maliyyə üzrə MBA dərəcəsi alıb.

Əmək fəaliyyətinə 2001-ci ildə “Azər-Türk Bank” ASC-də mühasib kimi başlayıb, sonradan “Azərbaycan İnvestisiya Şirkəti” ASC-də İnvestorlarla əlaqələr şöbəsini müdiri vəzifəsində işləyib.

Elnur Ələkbərov 2011-ci ildən Azərbaycan Respublikası Sahibkarlar (İşəgötürənlər) Təşkilatları Milli Konfederasiyasında (ASK) işləyir. Beynəlxalq əlaqələr və biznesin inkişafı şöbəsinin müdiridir. 
ASK-da işlədiyi dövrdə beynəlxalq təşkilatlar, maliyyə institutları, respublikamızda və xarici ölkələrdə fəaliyyət göstərən səfirliklərlə əməkdaşlığı genişləndirib. Bir çox sammit, konfrans, forum, sərgi və seminarlarda təşkilatçı və çıxışçı qismində Azərbaycanı təmsil edib.