Məşrutə inqilabının lideri Şeyx Məhəmməd Xiyabani və Milli sərdar Səttar Xanın məzarları Tehrandan Təbrizə köçürüləcək.
Bunu İran mediasına müsahibəsində Güney Azərbaycanın millət vəkili Qulamhüseyn Məsudi Reyhan deyib.
"Səttar Xan və Şeyx Məhəmməd Xiyabani Azərbaycanın tarixi şəxsiyyətləri və miflərindən sayılır. Onların məzarının Təbrizə köçürülməsi ilə bağlı müəyyən işlər görülüb, bələdiyyə idarəsi bunun üçün cari ildə xüsusi büdcə də nəzərdə tutub. Mən də davamlı olaraq bu məsələni gündəmdə saxlayıram”, - deyə Q.M.Reyhan bildirib.
Təbriz Şəhər Şurası sədrinin müavini Sonya Əndiş də Q.M.Reyhanın sözlərini təsdiqləyib və cari ildə köçürülmə ilə əlaqəli bütün məsəllərin həll olunacağını bildirib:
"Məqbərə tikmək və büdcə vəsaiti ayırmadan əvvəl bu işin hüquqi, qanuni və şəriət məsələləri aydınlaşıb və öz həllini tapmalıdır. Bundan sonra bələdiyyə idarəsi məzarların köçürülməsi və məqbərə tikmək üçün hərəkətə keçməlidir. İstənilən halda cari ildə tarixi şəxsiyyətlərimizin anılması ilə bağlı xüsusi büdcə vəsaiti nəzərdə tutulub”.
Qeyd edək ki, Şeyx Məhəmməd Xiyabaninin məzarı Tehranda Şah Əbdüləzimdə yerləşən qəbiristanlıqda, Milli sərdar Səttar Xanın məzarının bir neçə metrliyindədir. Hər iki məzar hazırda olduqca baxımsız vəziyyətdədir.(Axar.az)

Xəbərdən istifadə edərkən istinad etmək vacibdir.