Xeberle.com xəbər verir ki, bu barədə mayın 14-də Azərbaycan Şəhər Bələdiyyələrinin Milli Assosiasiyası üzvlərinin Sumqayıt şəhərində keçirilən ümumi yığıncağında danışılıb.

Yığıncaqda Prezident Administrasiyasının Ərazi-təşkilat məsələləri şöbəsinin məsul işçiləri, Milli Məclisin Regional məsələlər komitəsinin üzvləri, Ədliyyə Nazirliyinin Bələdiyyələrlə İş Mərkəzinin, Azərbaycan Qəsəbə və Kənd Bələdiyyələrinin Milli Assosiasiyalarının, qeyri-hökumət təşkilatlarının təmsilçiləri və kütləvi informasiya vasitələrinin nümayəndələri iştirak ediblər.

Qonaqlar əvvəlcə xüsusi avtobusla şəhərə səyahət edərək Sumqayıtda son illərdə görülən işlərlə yaxından tanış olub, Prezident İlham Əliyevin möcüzə adlandığı "Bulvar” kompleksini gəziblər.

Milli Məclisin Regional məsələlər komitəsinin sədri Arif Rəhimzadə, deputat Azər Badamov, Prezident Administrasiyasının Ərazi-təşkilat şöbəsinin Bələdiyyələrlə iş sektorunun müdiri Emin Eyvazov, Ədliyyə Nazirliyinin Bələdiyyələrlə İş Mərkəzinin rəisi Zahir Əlizadə, Sumqayıt Şəhər İcra Hakimiyyəti başçısının birinci müavini Teymur Səmədov və digərləri Heydər parkında Ümummilli Liderin abidəsini ziyarət edib, önünə tər güllər düzüblər.

Sonra Hüseyn Ərəblinski adına Sumqayıt Dövlət Dram Teatrının konfrans zalında Assosiasiyaya üzv olan 69 şəhər bələdiyyəsindən və Naxçıvan Muxtar Respublikası Şəhər Bələdiyyələrinin Assosiasiyasından seçilmiş nümayəndələrin iştirak ilə ümumi yığıncaq öz işinə başlayıb.

Azərbaycan Şəhər Bələdiyyələrinin Milli Assosiasiyasının sədri Təmraz Tağıyev qurumun 2017-ci ildəki fəaliyyəti haqqında hesabatı təqdim edib. Qeyd olunub ki, ölkədə uğurla davam etdirilən dövlət siyasəti bələdiyyə orqanlarının ictimai-siyasi həyatımıza daha yaxından inteqrasiyasına səbəb olub, vətəndaşların yerli özünüidarəetmədə fəallığını artıb. Hesabat ilində Milli Məclisin Regional məsələlər komitəsi, Ədliyyə Nazirliyinin Bələdiyyələrlə İş Mərkəzi, eləcə də ölkənin QHT sektoru ilə qarşılıqlı faydalı əməkdaşlıq əlaqələri davam etdirilib, bələdiyyələrin qanunvericilik bazası təkmilləşib.

Diqqətə çatdırılıb ki, qarşılıqlı faydalı əməkdaşlıq nəticəsində bələdiyyələrin müasir dövrün çağırışlarına daha yaxından inteqrasiyasına, ərazidə prioritet seçilən sosial məsələlərin daha tez həllinə nail olmaq mümkündür. Bu baxımdan görülmüş işlərin bir hissəsinin yerli özünüidarəetmənin təkmilləşdirilməsi ilə bağlı olduğunu vurğulayan sədr bildirib ki, Milli Assosiasiyaların təşəbbüsü və tövsiyəsi əsasında hər il bələdiyyələrdə keçirilən "Yerli Demokratiya Həftə”ləri əhalinin bələdiyyə idarəçiliyində daha yaxından iştirakına müsbət təsir göstərir. Belə ki, "Yerli Demokratiya Həftə”si ilə bağlı bələdiyyə binalarının qarşısında, əhalinin sıx toplaşdığı yerlərdə müxtəlif şüarların asılması, sosial şəbəkələr və xəbər portallarında əvvəlcədən yerləşdirilən elanlar bu tədbirlərin kütləviliyini xeyli artırıb.

Təmraz Tağıyev qeyd edib ki, "Yerli Demokratiya Həftə”si tədbirlərinin 10 illik yubileyinə həsr olunmuş belə tədbirlər çərçivəsində 1108 görüşdə 76804 nəfər iştirak edib, bələdiyyələrdə 6123 nəfər vətəndaşın qəbulu aparılıb, yeni təklif və təşəbbüslər irəli sürülüb.

"Yerli özünüidarəetmənin təşkilində məhəllə komitələrinin gücündən bacarıqla istifadə etməliyik”, - deyən sədr bu məsələdə Yasamal, Nərimanov, Sumqayıt, Mingəçevir və Şirvan bələdiyyələrinin fəallığını xüsusi qeyd edib. T.Tağıyev Assosiasiyanın İcra katibliyinin bələdiyyələrin məhəllə komitələrinin işinin canlandırılması üçün əlavə tədbirlər görməli olduğunu, bu sahədə ən qabaqcıl təcrübənin öyrənilməsinin vacibliyini vurğulayıb.

Məruzəçi hesabat dövründə Milli Assosiasiyanın yerli özünüidarəetmə məsələləri ilə bağlı Avropa Şurası Yerli və Regional Hakimiyyətlər Konqresi, beynəlxalq qurumlar və qeyri-hökumət təşkilatları, xarici ölkələrin bələdiyyələri və assosiasiyaları ilə əməkdaşlıq əlaqələrinin davam etdirildiyini diqqətə çatdırıb.

Sonra Nəzarət-təftiş komissiyasının hesabatı və Milli Assosiasiyasının 2018-ci il üçün büdcəsi haqqında məsələlər müzakirə edilib.

Məruzələr ətrafında Naxçıvan Muxtar Respublikasının Şəhər Bələdiyyələri Assosiasiyasının sədri Nuraləm İbrahimov, Sumqayıt şəhər bələdiyyəsinin sədri Sultan Əsədov, Səbail bələdiyyəsinin sədri Firdovsi Cəbrayılov, Qax bələdiyyəsinin sədri Eyvaz Orucov, Yevlax bələdiyyəsinin sədri Elmi Səfərəliyev, Qazax bələdiyyəsinin sədri Tofiq Orucov təmsil etdikləri özünüidarəetmə orqanlarının fəaliyyəti haqqında məlumat verib, Şəhər Bələdiyyələri Assosiasiyasının hesabat dövründə işini məqbul hesab edib, ümumi işin təkmilləşməsi üçün maraqlı təkliflər irəli sürüblər.

Hələ görüləsi işlərin çox olduğunu qeyd edən Milli Məclisin Regional məsələlər komitəsinin sədri Arif Rəhimzadə diqqəti dövlət qurumları ilə bələdiyyələrin birgə fəaliyyətinin vacibliyinə yönəldib. O, Ədliyyə Nazirliyinin Bələdiyyələrlə İş Mərkəzini yerli bələdiyyələrə nəzarət funksiyası ilə bərabər onlara yardımçı olmağa səsləyib, daha sıx əməkdaşlığın önəmini vurğulayıb.

Prezident Administrasiyasının Ərazi-təşkilat şöbəsinin Bələdiyyələrlə iş sektorunun müdiri Emin Eyvazov çıxışında bələdiyyələrin inkişafında mövcud vəziyyətdən və perspektivlərdən danışarkən bildirib ki, özünüidarəetmə orqanlarının maliyyə-iqtisadi vəziyyətinin zəifliyi, vətəndaşların sosial sifarişlərindən irəli gələn iri layihələri reallaşdıra bilməməsi, bələdiyyələrdə kadr potensialından düzgün istifadə olunmaması kimi irad və problemlər hələ də həllini tapmayıb. Elə bu səbəbdən də tövsiyə olunan istiqamətlər üzrə tədbirlər bundan sonra da davam etdirilməlidir.

Qeyd edilib ki, vergi və ödənişlərin toplanması, gəlir və xərclər sahəsində şəffaflığın təmin olunması məqsədilə Prezident Administrasiyasının dəstəyi ilə Azərbaycan Şəhər, Qəsəbə və Kənd Bələdiyyələrinin Milli Assosiasiyaları tərəfindən Bələdiyyələrin Avtomatlaşdırılmış Məlumat Sistemi (BAMS) proqramı hazırlanıb və artıq bir ildən çoxdur ki, bələdiyyələrdə tətbiq edilir. "Bu proqram vasitəsi ilə, eyni zamanda, Dövlət Statistika Komitəsi ilə birgə aparılan təhlillərin nəticəsinə əsasən, 2017-ci ildə ölkə bələdiyyələrinin ümumi büdcə gəlirləri, 2016-cı ilə nisbətən 14,1 faiz artaraq 36.079,400 manat təşkil edib”, - deyən Emin Eyvazov diqqətə çatdırıb ki, respublikanın 54 şəhər və rayon bələdiyyələri üzrə yerli büdcə gəlirlərində artım baş verib. Bu da daha çox qəsəbə və kənd bələdiyyələrinin payına düşür.

Emin Eyvazov müsbət nümunə kimi Sabunçu rayonunun Bakıxanov bələdiyyəsinin işə kreativ yanaşmasını misal gətirib. Belə ki, bu bələdiyyə nəzdində artıq 2 müxtəlif profilli məhdud məsuliyyətli cəmiyyət təsis edilib və Vergilər Nazirliyi tərəfindən dövlət qeydiyyatına alınıb. Bunlardan biri - "Bakıxanov bələdiyyəsi Dizayn, Layihə, Təmir, Tikinti, Xidmət” MMC bu günlərdə fəaliyyətə başlayıb, "Bakıxanov bələdiyyəsi Taksi Xidməti” MMC isə artıq qəsəbə sakinlərinə xidmət göstərir. 2018-ci ildə Bakıxanov bələdiyyəsi sosial-iqtisadi yönümlü daha bir layihəni həyata keçirməyi planlaşdırır. Qəsəbə sakinlərini daha ucuz və keyfiyyətli kənd təsərrüfatı məhsulları ilə təmin etmək məqsədilə bələdiyyə müəssisəsi Abşeron rayonunun Məmmədli bələdiyyəsinin ərazisində 3 hektar torpaq sahəsini uzunmüddətli icarəyə götürüb. Həmin torpaq sahəsində əhalinin daha çox tələbatı olan kənd təsərrüfatı məhsullarının yetişdirilməsi və satışını təşkil etmək məqsədilə yeni bir müəssisənin yaradılmasına başlayıb. "Bu nümunə kifayət edir ki, bələdiyyə sədrləri ciddi düşünsünlər və bu istiqamətdə əməli fəaliyyətə başlasınlar”, - deyə Emin Eyvazov vurğulayıb.

Sonda ümumi yığıncaq müzakirə olunan məsələlər barədə müvafiq qərarlar qəbul edilib.