Ağsu rayon Ləngəbiz kənd orta məktəbinin direktoru Müşfiq Mirzəyevin məktəbin müəllimi tərəfindən döyülməsi ilə bağlı yayılan xəbərlər yalandır.
Bu sözləri Axar.az-a açıqlamasında Ağsu rayon Təhsil Şöbəsinin müdiri Səftər Əlabbasov deyib. O bildirib ki, direktor toyda olarkən döyülüb:
"Hadisə saat 16.00-17.00 radələrində Şamaxının Göylər kəndində toyda baş verib. Hadisənin qəsdən və yaxud təsadüf nəticəsi olması ilə bağlı məlumatım yoxdur. Direktorun başına su şüşəsi atan şəxs müəllim olmayıb. Direktorla əlaqə saxlamışıq. O bizə bildirib ki, toyda kimsə onun başına su şüşəsi atıb. Səhhətində ciddi problem yoxdur. Sabah, ya da birigün vəzifəsinin icrasına başlayacaq. Səhhətinin ağır olması xəbəri yalandır. Müşfiq Mirzəyev neçə ildir ki, məktəbdə müəllim kimi çalışıb. Ötən il də məktəbin direktoru vəzifəsinə təyin olunub”.
Qeyd edək ki, bu gün Ağsu rayon Ləngəbiz kənd orta məktəbinin direktoru, Şamaxı rayonunun Çöl Bağırlı kənd sakini, 1985-ci il təvəllüdlü Müşfiq Əlseyran oğlu Mirzəyevin məktəbin müəllimi tərəfindən döyülməsi ilə bağlı Report xəbər yaymışdı.

Xəbərdən istifadə edərkən istinad etmək vacibdir.