Fövqəladə Hallar Nazirliyinin Sumqayıt Regional Mərkəzi tərəfindən Bakı Mühəndislik Universitetində "Fövqəladə hadisələrin nəticələrinin aradan qaldırılmasında mülki müdafiə orqan və qüvvələrinin idarə olunması” mövzusunda rəhbər heyətin nümunəvi mülki müdafiə məşqi keçirilmişdir.
Tədbirdə Sumqayıt Regional Mərkəzinin, Abşeron rayon Dövlət Yanğından Mühafizə Hissəsinin, Qızıl Aypara Cəmiyyətinin Sumqayıt bölməsinin, Abşeron rayon Təcili Tibbi Yardım Stansiyasının, universitetin rəhbər, müəllim və tələbə heyəti iştirak etmişdir.
Məşqin keçirilməsində əsas məqsəd, baş verə biləcək istehsalat qəzaları və digər fövqəladə hadisələr zamanı işçilərin və tələbələrin mühafizəsinin təmin edilməsi, ilkin qəza xilas etmə və yanğın söndürmə qüvvələrinin hadisələrin qarşısının alınması üzrə tədbirlərin həyata keçirilməsinin və cəlb edilən rayon qüvvələri arasında qarşılıqlı fəaliyyətinin, eləcə də rəhbərlik tərəfindən idarə etmənin təşkilinin yoxlanılması olmuşdur.
Tədbirdə, fövqəladə hadisələr zamanı verilən məlumatlar əsasında işçilərin və tələbələrin təhlükəli ərazidən təxliyyə edilməsi, qəza yerində kəşfiyyatın təşkili, xəsarət alanların qəza zonasından çıxarılması və onlara ilkin tibbi yardımın göstərilməsi, eləcə də baş vermiş yanğının söndürülməsi zamanı obyekt qüvvələri ilə FHN-nin hadisə yerinə cəlb olunan qüvvələri arasında qarşılıqlı fəaliyyət yüksək səviyyədə təşkil edilmişdir.
Tədbirin sonunda məşqin yekunu qiymətləndirilmiş, nöqsanlar araşdırılmış və onların gələcəkdə aradan qaldırılması üçün təkliflər verilmişdir.
FHN Sumqayıt Regional Mərkəzin
İctimaiyyətlə əlaqə və təbliğat sektoru
Xəbərdən istifadə edərkən istinad etmək vacibdir.
