Fövqəladə Hallar Nazirliyinin Sumqayıt Regional Mərkəzi 31 may 2018-ci il tarixində Xızı rayon Heydər Əliyev Mərkəzində Xızı rayon İcra Hakimiyyətinin mətbuat orqanı olan "Xızı" qəzetinin və yerli KİV-nin əməkdaşlarının iştirakı ilə "Fövqəladə hallarla bağlı əhalinin maarifləndirilməsində mətbuatın rolu” mövzusunda "dəyirmi masa” keçirmişdir.
Tədbirin keçirilməsində əsas məqsəd baş verə biləcək fövqəladə hadisələrin qarşısının vaxtında alınması, fövqəladə hallar zamanı insanlar arasında davranış qaydalarına əməl etmə vərdişlərinin təkmilləşdirilməsi və əhalinin mətbuat vasitəsilə mütəmadi olaraq maarifləndirilməsində yerli KİV-ilə əməkdaşlığın müzakirə edilməsi olmuşdur.
Tədbirdə Sumqayıt Regional Mərkəzin, Xızı rayon Dövlət Yanğın Mühafizə Hissəsinin, Xızı rayon İcra Hakimiyyətinin, "Xızı" qəzetinin əməkdaşları iştirak etmişdir.
Tədbirdə Regional Mərkəzin fəaliyyət istiqamətləri, gördüyü işlər, yerli KİV-lərin əhalinin maarifləndirilməsində rolundan danışılmış və gələcəkdə yerli kütləvi informasiya vasitələri ilə əlaqələri qarşılıqlı əməkdaşlıq çərçivəsində daha da genişləndirmək və gücləndirməyə çalışacağı qeyd edilmişdir. Həmçinin bu cür tədbirlərin silsilə olaraq Regional Mərkəzin əhatə etdiyi ərazidə fəaliyyət göstərən yerli KİV-ilə keçiriləcəyi diqqətə çatdırılmışdır.
Sonda tədbir iştirakçıları ilə qarşılıqlı fikir mübadiləsi aparılmış, Mərkəzin əməkdaşları tərəfindən tədbir iştirakçılarını maraqlandıran suallar cavablandırılmış və onlara maarifləndirmə xarakterli təbliğat materialları, yaddaş kitabçaları və bukletlər paylanılmışdır.
FHN Sumqayıt Regional Mərkəzin
İctimaiyyətlə əlaqə və təbliğat sektoru
Xəbərdən istifadə edərkən istinad etmək vacibdir.
