Bu gün Facebook sosial şəbəkəsinin 10 yaşı tamam olur. Azərbaycanda da 1 milyondan çox abunəçisi olan bu şəbəkəyə dünyanın əksər ölkələrinin dövlət və hökumət başçıları qoşulub. Ölkəmizdə aktiv şəkildə istifadə olunan bu şəbəkənin üzvləri arasında Azərbaycan prezidenti İlham Əliyevlə yanaşı bəzi nazirlər və qurumlar da var. FaktXəbər-in məlumatına görə, bu gün Azərbaycandan Facebook-a ilk dəfə qoşulanlar arasında Prezident Administrasiyasının rəhbəri, akademik Ramiz Mehdiyev də olub.
Ramiz Mehdiyevin adına açılan səhifədə onun müraciəti yerləşdirilib:
"İnformasiya kommunikasiya texnologiyaları olmadan müasir dünyanı, gündəlik fəaliyyəti təsəvvür etmək mümkün deyil. İnternet təkcə məlumat yığını olmayıb, bəşəriyyətinin virtual portretini, yeni fəlsəfəni formalaşdırır. Sosial şəbəkələr ünsiyyəti asanlaşdırmaqla qarşılıqlı münasibətlərdə yeni platforma yaradır.
Azərbaycan Respublikası informasiya cəmiyyəti quruculuğu sahəsində böyük uğurlara imza atır, ölkədə İKT sürətlə inkişaf edir. Gələcəyə hesablanmış, düşünülmüş siyasət Azərbaycanı yaxın illərdə inkişaf etmiş dövlətlərin sırasına çıxaracaqdır.
Elektron və mobil hökumət, kosmik sənaye, innovasiyalı iqtisadiyyat, biliyə əsaslanan cəmiyyət qurarkən cənab Prezident İlham Əliyev Azərbaycan elminə, gənclərimizin böyük potensialına arxalanır.
Gənclərimiz və əhalinin digər yaş qrupları arasında getdikcə populyarlıq qazanan facebook sosial şəbəkəsində öz səhifəmi yaratmaqdan məmnunluq duyuram. Burada mütəmadi olaraq fikir və düşüncələrimi paylaşacağam."
/faktxeber.com/
Xəbərdən istifadə edərkən istinad etmək vacibdir.
