Qarabağ uğrunda gedən döyüşlərdə həlak olan oğul və qızlarımızın adını əbədiləşdirmək, xatirəsini əziz tutmaq üçün Azərbaycanın bütün bölgələrində, eləcə də Sumqayıt şəhərində abidələr qoyulub, bulaqlar tikilib, parklar salınıb.
"Şəhid bulaqları” adlandırılan bu bulaqlardan bir çox insan yararlanaraq onların əziz xatirəsini yad edirlər. Lakin bəzən bulaqlardan suyun gəlməməsi sakinlərin haqlı narazılıqlarına səbəb olur.
Maraqlıdır, "Şəhid bulaqları”nın su ilə mütəmadi təmin olunmasına hansı qurum nəzarət edir? Sualımıza cavab tapmaq üçün Xeberle.com olaraq Sumqayıt şəhər Su Kanal İdarəsinin rəis müavini Qurban Mikayılov ilə əlaqə saxladıq. Q. Mikayılov "Şəhid bulaqları”na suyun verilməsinin "Azərsu” Açıq Səhmdar Cəmiyyəti (ASC) tərəfindən təmənnasız şəkildə həyata keçirildiyini bildirdi:
"Baxımlı olan və sınıdırılmayan bulaqları biz su ilə təmənnasız olaraq təmin edirik. Bəzən həmin bulaqlardakı sudan şəhidlərin xatirəsinə hörmətsizlik edilərək avtomobillərin, palazların yuyulması üçün istifadə olunur. Buna baxmayaraq "Azərsu” ASC tərəfindən nəzarətsiz qalmayan və bərpa edilərək su ilə təmin edilməsi mümkün olan "Şəhidlər bulaqları” daim su ilə təchiz olunur”.
Elnarə Salamova
Xeberle.com
Xəbərdən istifadə edərkən istinad etmək vacibdir.
