Azərbaycanlı milyarder İqor Aşurbəyli kosmosda yerdən asılı olmayan dövlət qurub.
Xeberle.com-un verdiyi məlumata görə, bu barədə İ.Aşurbəylinin özü virtualaz.org-a açıqlama verərək bildirib. Onun sözlərinə görə, hətta bu yaxınlarda "Asgardiya” adlanan bu dövlətin parlamentini, hakimiyyətini formalaşdırmağa başlayıb. Hazırda isə hakimiyyətdə və parlamentdə 200-dən çox adam işləyir.
Kosmosda dövlət qurmağın nə dərəcədə real ola biləcəyi haqqında məlumat əldə edə bilmək üçün Şamaxı Rəsədxanasının direktoru Namiq Cəlilov ilə əlaqə saxladıq.
N.Cəlilov kosmosda dövlət qurmağın qeyri-mümkün olduğunu bildirdi:
"Bütün dünya astronomları harada həyat var prinsipi ilə bu qədər işlər görürlər (süni peyklər buraxır, galaktikanın müxtəlif ulduzlarını müşahidə edirlər). Amma hələ də həyat üçün yararlı bir şərait tapılmayıb. Hansı dövlətdən, hökumətdən söhbət gedə bilər?! Bu nə deməkdir? O, hansı vasitələrlə planetlərə uçdu? Hazırda bizim malik olduğumuz sürətlə ən yaxın ulduzlara belə uçmaq üçün on min, yüz min işıq ili lazımdır. Ən yaxın planet Marsdır, amma hələ orada da suyun olub-olmaması sual altındadır. Ağıla gəlməyən sözlər deyir. Buna heç bir şərh vermək mümkün deyil. Tamamilə fiksiyadır”.
Elnarə Salamova
Xeberle.com
Xəbərdən istifadə edərkən istinad etmək vacibdir.