Din və cəmiyyət arasında daim bir əlaqə var. Cəmiyyətin dinə təsiri olduğu kimi, din də cəmiyyətə təsir edir. Günümüzdə bu təsirin necə effektiv olduğunu qavrayaraq öz mənafeləri uğrunda dini qruplaşmalar yaradan bir çox insan mövcuddur. Hansı ki, onlar qruplarına daha çox cəmiyyətin vəd və təhdidlərdən təsirlənən üzvləri olan uşaqları cəlb etməyə can atırlar. Bəs valideynlər övladlarını bu kimi təhlükələrdən necə qoruya bilərlər?

 

 

Bu barədə Xeberle.com-a açıqlama verən psixoloq Sevinc Baxışova bu kimi faktların qarşısını alınması üçün maarifləndirmə işlərinin gücləndirilməsinin vacib olduğunu vurğuladı: "Dinin bizə nələr gətirdiyini görmək, anlamaq üçün xüsusi bir iti zəka sahibi olmaq şərt deyil. Ona görə də gələcək nəsillərə dini təbliğ etmək yox,dinlərin necə yayıldığını, dinin dominant olduğu ölkələrin necə yaşadığı barədə məlumat verib seçimi öz öhdələrinə buraxmaq lazımdır. Sirr deyil ki, uşaqların dini sektalara cəlb edilməsi artıq ölkənin ayrı-ayrı regionlarında deyil, bütün Azərbaycanda mövcuddur. Dini sektalara yönləndirilən uşaqların sayı elə də az deyil. Onlar adətən ailədə qayğı görməyən, iradəsi zəif olan, ünsiyyətə olan tələbatını ailədə tapmayan, psixoloji travma ilə üzləşən, eyni zamanda sosial vəziyyəti aşağı olan ailələrin uşaqları olur. Şəxsən mənim rastlaşdığım hallar göstərir ki, uşaqlar "vəhhabizm" deyilən cərəyanlara qosulurlar. Belə uşaqlar görünüşündə dəyişikliklər edir, ailədə valideynlərin sözünü dinləmirlər. Dini sektalara üz tutan uşaqlar ciddi psixoloji təsir altında olurlar. Hətta bu sektaların sayəsində uşaqlar cinayətə belə sövq edilirlər. Bu gün biz uşaqlara hansı məlumatları çatdırsaq, onlar da gələcək nəsillərə onu çatdıracaq. Bu kimi faktların qarşısını almaq üçün maarifləndirmə işlərinin gücləndirilməsi mütləqdir. Uşaqların dini etiqada görə təhsildən yayınmağa məcbur edən qurumlar məsuliyyətə cəlb edilməlidir. Hətta bu valideynlər olsa belə. Bu işə həm polis, həm yerli İcra Hakimiyyəti orqanları, həm də təhsil müəssisələri cəlb edilməlidir”.

Elnarə Salamova

Xeberle.com