2025-ci ildə dünya üzrə milyarderlərinin sayı ötən ilin eyni dövrü ilə müqayisədə 287 nəfər artıb.
Xeberle.com məlumat verir ki, bu barədə İsveçrənin UBS bankı araşdırma aparıb.
Analitiklərin fikrincə, hazırda dünyada 2 545 kişi və 374 qadın olmaqla 2 919 milyarder var. Onların ümumi sərvəti il ərzində 13% artaraq 15,8 trilyon dollara çatıb.
UBS-in məlumatına görə, ABŞ milyarderlərin sayına görə birinci yerdədir (924). Asiya-Sakit okean regionu ikinci, Avropa, Yaxın Şərq və Afrika üçüncüdür.
Bundan əvvəl, "Forbes" jurnalı planetin ən zəngin insanlarının illik reytinqini açıqlayıb. Tesla və SpaceX-in qurucusu İlon Mask 400 milyard dolları ötmüş xalis sərvəti ilə siyahıya başçılıq edir. "Oracle"ın həmtəsisçisi və sədri Larri Ellison 276 milyard dollarlıq sərvətlə ikinci yerdə qərarlaşıb. Meta şirkətinin həmtəsisçisi Mark Zukerberq 253 milyard dollar sərvəti ilə üçüncü olub.
Xəbərdən istifadə edərkən istinad etmək vacibdir.
