"Sumqayıt gənclərinin "Yay məktəbi” başa çatdı. Bu layihə artıq 2 ildir ki, Sumqayıt şəhər İcra Hakimiyyətinin təşəbbüsü, Gənclər və İdman Baş İdarəsinin təşkilatçılığı ilə reallaşır. Bu günlərdə təşkil edilən "Yay məktəbi”ndə ayrı-ayrı sahələri təmsil edən yaradıcı, istedadlı və ictimai fəal gənclər iştirak ediblər."
Bu sözləri Xeberle.com-a açıqlamasında Sumqayıt şəhər Gənclər və İdman Baş İdarəsinin rəis əvəzi Mübariz Bəşirov deyib. M. Bəşirov "Yay məktəbi”nin keçirilməsinin əsas məqsədini də açıqlayıb: "Layihənin məqsədi gəncləri ölkəmizin ayrı-ayrı bölgələrinin tarixi və mədəniyyət abidələri ilə tanış etməkdən, onlara vətənpərvərlik hissinin aşılanması və asudə vaxtın səmərəli təşkilindən ibarətdir. "Yay məktəbi” çərçivəsində gənclər asudə vaxtlarını səmərəli keçirməklə yanaşı, eyni zamanda, Azərbaycanın ən qədim tarixi bölgələrinin də tarixi və mədəniyyəti ilə yaxından tanış olublar."
Rəis əvəzi bu ilki "Yay məktəbi"ndə 251 gəncin iştirak etdiyini vurğulayıb.
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
