Bir neçə gün öncə ləğv edilən Bakı Şəhər İcra Hakimiyyətinin (BŞİH) Xidmət və Ticarət Departamentinin mətbuat xidmətinin rəhbəri Əlabbas Bağırov yeni vəzifəyə təyin olunub.

Xeberle.com bildirir ki,bu barədə məlumatı Bizimyol.info-ya Əliabbas Bağırovun özü verib. O qeyd edib ki, sözügedən müəssisədən 1 həftədir ayrılmasına baxmayaraq ona yeni iş təklifi gəlib və o da bunu müsbət dəyərləndirib:
"Xidmət və Ticarət Departamentində mətbuat xidməti şöbəsi olmayıb, sadəcə mətbuat xidmətinin rəhbəri ştatı olub. Həmin ştat isə 2009-cu ildə ləğv edilib. Mən sadəcə olaraq departamentdə mütəxəssis kimi çalışmışam, eyni zamanda mətbuat xidmətinin rəhbəri işini icra etmişəm. Mən vəzifəmdən çıxarılmamışam, sadəcə olaraq öz xahişimlə işdən azad olunmuşam və Azərbaycan Metrologiya İnstitutunun mətbuat xidmətinin rəhbəri vəzifəsinə təyin edilmişəm”.

Xatırladaq ki, Ə.Bağırov həm də 15-dən artıq kitabın müəllifidir. Onun məqalələri Azərbaycanla yanaşı, İran, Türkiyə və Gürcüstanda çap olunub.