"Respublika üzrə bu ilin 8 ayı ərzində nikaha daxil olmaq istəyən 93138 nəfər tibbi müayinədən keçib".
Bunu Xeberle.com-a açıqlamasında B.Eyvazov adına Elmi-Tədqiqat Hematologiya və Transfiziologiya İnstitutunun direktoru Zöhrə Əlimirzəyeva bildirib.
O qeyd edib ki, həmin şəxslərin 2773 nəfərinin talassemiya daşıyıcısı, 40 cütlükdə hər ikisinin daşıyıcısı olduğu, 242 nəfərdə sifilis, 105 nəfərdə isə SPİD (QİÇS) xəstəliyi olduğu müəyyən edilib: "Müayinələrin nəticələri həmin şəxslərin qeydiyyatda olduqları tibb müəssisələrinə göndərilib. HİV infeksiyası ilə bağlı məlumatlar isə Respublika QİÇS-lə Mübarizə Mərkəzinə göndərilib. Çünki həmin şəxsləri təkrar müayinədən keçirməlidirlər".
Z.Əlimirzəyeva bildirib ki, müayinələrdən sonra nikaha daxil olmaq üçün cütlüklərə arayış təqdim olunur və orada müayinənin nəticələri əks olunmur. Arayış tibb müəssisəsinin rəhbəri və tibbi müayinənin aparılmasına məsul həkim tərəfindən imzalanır və müəssisənin möhürü ilə təsdiq edilir: "Nikaha daxil olmaq istəyən şəxslərin tibbi müayinəsinin nəticələri həkim sirridir. Nikaha daxil olmaq istəyən tərəf tibbi müayinənin nəticəsi barədə digər tərəfi məlumatlandırır və yazılı razılıqlarına əsasən cütlüyə həkim məsləhəti verilir. Tibbi arayışın verilməsi müddəti nikaha daxil olmaq istəyən şəxslərin tibb müəssisəsinə müraciət etdiyi gündən sonra 2 həftədən çox olmamalıdır. Tibbi arayışın etibarlılıq müddəti 1 aydır".
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
