Xeberle.com-a verilən məlumata  görə, Sumqayıt şəhər İcra Hakimiyyəti Mənzil Kommunal Təsərrufatı İstehsalat Birliyi tərəfindən Bakı-Quba yolunda yaşıllıq aksiyası keçirilib, 3500-dən çox çinar, şam, leylandra ağacı, 30 000-ə yaxın gül və gül kolları əkilib. Birliyin əməkdaşları, habelə fəal gənclərin iştirakı ilə həyata keçirilən ağacəkmə aksiyası zamanı yeni əkilən tinglər suvarılıb və onlara aqrotexniki qaydada qulluq göstərilib. Sumqayıt Kimya Sənaye Parkı ərazisi boyunca 3 km məsafədə əkilən ağac və güllərin suvarılma sistemi damla üsulu ilə həyata keçiriləcək.

Qeyd edək ki, aksiyada əsas məqsəd yaşıllıq zolaqlarının genişlənməsi, ekoloji tarazlığının bərpası, ekoloji mühitinin sağlamlaşdırılmasının sürətlənməsi, eləcə də insanlar arasında ekoloji mədəniyyətin və təbiətə qayğı hissinin güclənməsinə töhfə verməkdən ibarət olub. Sumqayıt ətrafında ətraf mühitin mühafizəsinə və yaşıllıqların arıtırılmasına yönəlik bu cür ağacəkmə kampaniyalarının davamlı olaraq keçirilməsi planlaşdırılır.