"Azərbaycan Vətən Müharibəsi Veteranları"  İctimai birliyinin Sumqayıt şəhər şöbəsi 1994-cü ildən fəaliyyət göstərir. Ümumilikdə ictimai birliyin 65 mindən çox üzvü var. Sumqayıt şəhər şöbəsinə gəldikdə isə rəhbərlik etdiyim təşkilat  3700 veteran, müharibə əlilini və şəhid ailələrinin özündə birləşdirir. Məqsədimiz Qarabağ müharibəsi əlillərinin, şəhid ailələrinin və veteranlarının qanuni mənafelərini və hüquqlarını müdafiə etmək, onların müasir həyat şəraitinə uyğunlaşdırılmasına, sosial-iqtisadi və mənəvi probremlərinin daha səmərəli həll olunmasına köməklik göstərmək, onların əməkdaşlığını və qarşılıqlı əlaqələrini möhkəmləndirməkdən ibarətdir."

Bu sözləri Xeberle.com-a açıqlamasında ""Azərbaycan Vətən Müharibəsi Veteranları" İctimai birliyinin  Sumqayıt şəhər şöbəsinin sədri Temuraz Mansurov deyib. T. Mansurov həyata keçirilən tədbirlərdən də söz açıb: "Birlik vaxtaşırı olaraq məktəblərdə, rayon və qəsəbələrdə vətənpərvərlik mövzularında tədbirlər keçirərək gənclərə vətən sevgisini aşılayır. Birlik daim çalışır ki, müharibə veteranları, əlillərin şəhid ailələrinin maddi rifahının yüksəlməsi üçün dövlətin, özlərinin və qismən də imkanlı şəxslərin imkanlarından maksimal dərəcədə istifadə etsin. Bütün bayramlarda çalışırıq imkanlı şəxslərin dəstəyi ilə tabeliyimizdə olan ailələrə yardımlar edib, işə ehtiyacı olan müharibə veteranlarına iş tapmaqda köməklik edək. Əlillərin və veteranların realibitasiyasında və müalicəsində də yardımçı olmağa çalışırıq. Bir çox müharibə əlili təmannasız əməliyyat olunub".