Sumqayıt şəhər Gənclər və İdman
Baş İdarəsi Gənclər Evində şəhərin müxtəlif sahələrində fəaliyyət göstərən gənclər
təşkilatları ilə 2018-ci ilin 9 ayı ərzində gənclərlə iş sahəsində görülən işlər
və qarşıda duran vəzifələrə dair görüş keçirib.
Xeberle.com-a verilən məlumata görə,
tədbiri giriş sözü ilə açan Baş İdarənin Gənclərlə iş sektorunun müdiri Ceyhun
Hüseynov Ümummilli Lider Heydər Əiyevin siyasi kursunun davamçısı Azərbaycan
Respublikasının Prezidenti cənab İlham Əliyev tərəfindən ölkəmizin digər bölgələrində
olduğu kimi Sumqayıtda da dövlət gənclər siyasətinin uğurla həyata
keçirildiyini, şəhər rəhbərinin diqqət və qayğısı nəticəsində Sumqayıtda həyatın
bütün sahələrində gənclərin fəallığı, təşəbbüskarlığı, irimiqyaslı layihələrin
icrasında və idarəetmədə rolu, dövlətə və dövlətçiliyə sədaqətçilik, vətənpərvərlik
ruhu və vətəndaşlıq mövqeyinin möhkəmləndirilməsi, istedadlı, yaradıcı gənclərin
üzə çıxarılması və könüllülük hərəkatının genişləndirilməsi istiqamətində görülən
işlərdən danışıb, ölkə başçısının 2017-ci il 15 sentyabr tarixli Sərəncamı ilə
təsdiq edilmiş "Azərbaycan gəncliyi 2017-2021-ci illərdə Dövlət Proqramı”
haqqında iclas iştirakçılarının diqqətinə çatdırıb.
C.Hüseynov bildirib ki, hesabat
dövründə Baş İdarə tərəfindən gənclərin dinamik inkişafı məqsədilə dövlət gənclər
siyasətinin istiqamətlərinə uyğun şəhərdə keçirilmiş 92 müxtəlif tədbirdə 10000
nəfərə yaxın gənc tamaşaçı və iştirakçı qismində iştirak edib, gənclərin təşkilatlanması
üçün zəruri imkanlar yaradılıb, mövcud təşkilatların ümumi maraqlar əsasında
birləşdirilməsi və könüllülük prinsipi əsasında əlaqələrin möhkəmləndirilməsində
fəaliyyət artırılmış, tələbələrin ictimai həyatda fəallığının genişləndirilməsi,
qeyri-hökümət təşkilatları ilə qarşılıqlı fəaliyyətin gücləndirilməsi diqqət mərkəzində
saxlanılıb.
Görüşdə Sumqayıt Dövlət
Universitetinin tələbə-gənclər təşkilatının sədri Nicat Hüseynov, Asan Xidmət Mərkəzinin
Gənclər Birliyinin üzvü Rza Mirzəzadə, Yeni Azərbaycan Partiyası Sumqayıt şəhər təşkilatının
üzvü Emin Əliyev, Sumqayıt Gənclər Evinin əməkdaşı
Məhəmməd Hüseynov, Sumqayıt Gənclər Klubunun sədri Teymur Aslanlı cari ilin 9
ayı ərzində görülən işlər və qarşıda duran vəzifələrlə bağlı çıxışlar edərək, təşkilatın
fəaliyyəti, maraq sahələrinə uyğun yaradılmış istiqamətlər, klublar, təkliflərin
öyrənilməsi məqsədi ilə keçirilən tədbirlər, yeni təşəbbüslər haqqında məlumat
veriblər.
Xəbərdən istifadə edərkən istinad etmək vacibdir.