Ötən il müvafiq qanunvericiliyə əsasən, Sumqayıt şəhər inzibati ərazi vahidi tərkibindəki Sumqayıt şəhəri ərazisində xəritələrə uyğun olaraq 1 nömrəli, 2 nömrəli, 3 nömrəli və 4 nömrəli sahələr -  inzibati ərazi dairələri yaradıldı və bu vahidlər Azərbaycan Respublikasının ərazi vahidlərinin Dövlət Reyestrinə daxil edildi. Ərazi dairələrinin dislokasiyasının müəyyən edilməsi istiqamətində işlər aparıldı. Təqribi dislokasiyaya əsasən 1 nömrəli inzibati ərazi dairəsi 41 saylı Sumqayıt I seçki dairəsinin, 2 nömrəli inzibati ərazi dairəsi 42 saylı Sumqayıt II seçki dairəsinin, 3 nömrəli inzibati ərazi dairəsi 43 saylı Sumqayıt III seçki dairəsinin, 4 nömrəli inzibati ərazi dairəsi isə 44 saylı Sumqayıt IV seçki dairəsinin ərazisində fəaliyyət göstərir.

Xəbərsiz Sumqayıt sakinləri

Bəs, görəsən, Sumqayıt sakinləri inzibati ərazi dairələrinin mövcudluğundan xəbərdardırlarmı? Bu məqsədlə kiçik bir sorğu keçirdik.

Hüseyn İbadlı (“Salamnews” agentliyinin əməkdaşı): Düzü, inzibati ərazi dairələrinə hər hansı məsələyə görə müraciətim olmayıb. Fəaliyyətləri ilə də bir o qədər tanış deyiləm. Düşünürəm ki, cəmiyyətin maraqlarını zamanında və heç bir əngəl olmadan təmin edən inzibati ərazi dairələri mövcud deyil. Təbii ki, ASAN xidmət istisna olmaqla.

Əli Hüseynov (tələbə):  Birinci dəfədir eşidirəm.  Heç bir məlumatım yoxdur.

Elmar Qarayev (tələbə): Bu barədə birinci dəfədir eşidirəm. Məlumatım yoxdur.

Abuzər Cəfərov (tərcüməçi): İnzibati ərazi dairələri deyəndə, nə nəzərdə tutulur ki?

Elçin Abdullayev (Politoloq): Fəaliyyətləri yalnız və yalnız fəaliyyətsizlikdən ibarətdir.

Feyruz Şivəxanov (hüquqşünas): Sumqayıtda inzibati ərazi dairələrinin fəaliyyəti ilə bağlı heç bir məlumatım yoxdur.

Murad Ağamiyev (tələbə): Səhv etmirəmsə, məzil kommunal idarələrini nəzərdə tutursunuz. Onların əhaliyə xidməti arayış vermək, bir də kommunal problemləri həll etmək olmalıdır.

Anar Qasımlı (vəkil): Heç bir məlumatım yoxdur.

Natiq Qubadov (həkim-psixiatr): Düzü, bu haqda məlumatsızam. Axı harda, nə vaxt elan ediblər bu yeni təsisatı? Yəqin yeni bir şeydir...

Əfqan Səfərli (mühasib): Təəssüflər olsun ki, məlumatım yoxdur.

İsmayıl Kərimov (pedaqoq): Bilirəm ki, 4 inzibati ərazi dairəsi var. Hansı xidmətlər göstərdikləri ilə bağlı heç bir məlumatım yoxdur.

Afət Yaqubova (PR menecer): Məsələn, mənim tanıdığım bircə ərazi vergi idarəsidir. Çox normal işləyirlər. Qalan heç biri ilə heç bir işim olmayıb.

Sorğunun nəticələrindən göründüyü kimi, şəhər sakinləri bu ərazi dairələri haqqında məlumatlı deyillər.

Bəs inzibati ərazi dairə nümayəndələrinin səlahiyyətlərin nədən ibarətdir?

Sumqayıt Şəhər İcra Hakimiyyətinin Ərazi İdarəetmə və Yerli Özünüidarəetmə orqanları ilə iş şöbəsinin baş məsləhətçisi Nizami Quliyev Xeberle.com-a açıqlamasına deyir ki, şəhər icra hakimiyyətinin əhaliyə daha da yaxınlaşması və idarəetmənin səmərəliliyinin artırılması məqsədi ilə ölkə prezidenti İlham Əliyev 2012-ci il, 29 noyabr tarixli 2570 nömrəli Sərəncam imzalayıb. Onun sözlərinə görə, bu sərəncama əsasən, Sumqayıt şəhərində 4 sahə inzibati ərazi dairələri yaradılıb ki, bunlar da aşağıdakılardır:

- 1 saylı Ərazi İcra nümayəndəliyi – nümayəndə Astanov Mütəllim Dağbəyi oğlu (Ünvan: Bağlar idarəsi yerləşən bina, 5-ci məh, ev,19b, 2-ci mərtəbə)

- 2 saylı Ərazi İcra nümayəndəliyi – nümayəndə Abdullayev Arzu Piriş oğlu (5-ci mikrorayon S.Vurğun küçəsi, 8 saylı yataqxana, 1-ci mərtəbə qeyri-yaşayış sahəsi)

- 3 saylı Ərazi İcra nümayəndəliyi – nümayəndə Fərhadov Araz Bayram oğlu (9-cu mikrorayon, ev 72, 1-ci mərtəbə qeyri yaşayış sahəsi, 14 saylı MİS yerləşən bina)

- 4 saylı Ərazi İcra nümayəndəliyi - nümayəndə  Əliyev Elvaris Rüstəm oğlu (18-ci mikrorayon, M.Əsədov küç, ev 20)

Ərazi nümayəndəlikləri nə işlə məşğuldur?

N.Quliyev nümayəndəliklərin fəaliyyət istiqamətlərindən də danışdı: “Sahə inzibati ərazi dairələri üzrə nümayəndəliklərin işi əhalinin sosial əhəmiyyətli sifarişlərini öyrənmək, ərazidə fəaliyyət göstərən dövlət qurumları ilə, bələdiyyələrlə, qeyri-hökümət təşkilatları ilə və digər təşkilatlarla qarşılıqlı fəaliyyəti təmin etmək, ərazidə mənzil-kommunal təsərrüfatı və mənzil istismarı sahəsində fəaliyyət göstərən, məişət tullantılarının yığılması və daşınması, abadlaşdırma, yaşıllaşdırma, təmizlik və işıqlandırma işlərini yerinə yetirən qurumların fəaliyyətini əlaqələndirmək, vətənpərvərlik sahəsində və mədəni kütləvi tədbirlərin keçirilməsi, “Vətəndaşların müraciətlərinə baxılması qaydası haqqında” Azərbaycan Respublikasının Qanunu ilə müəyyən edilmiş qaydada vətəndaşların qəbulunu həyata keçirmək, onların ərizə, şikayət və təkliflərinə baxmaq, lazımi tədbirlər görmək və nəticəsi barədə vətəndaşlara məlumat verməkdən ibarətdir. Sahə inzibati ərazi dairələrinin yaradılması idarəetməni, icra hakimiyyəti orqanlarının əhaliyə daha yaxın olması məqsədi güdür. Vətəndaşa artıq bir arayış almaq üçün icra hakimiyyətinə getmək lazım gəlməyəcək və həmin arayış sahə inzibati ərazi dairələrində veriləcək”.

 Ümidvarıq ki, ərazi dairələri dövlət hakimiyyəti orqanlarının əhaliyə yaxınlaşması və idarəetmənin səmərəliliyinin artırılması istiqamətində mühüm rol oynaya biləcək.

Amma görünən odur ki, ötən müddət ərzində nümayəndəliklərin fəaliyyəti ilə bağlı Sumqayıt sakinlərinin məlumatı yoxdur.

Ramil Yaquboğlu, Xeberle.com