Bakı ilə Sumqayıt şəhərləri arasında hər gün minlərlə sərnişin gediş-gəliş edir. İşə, dərsə və ya müxtəlif xidmət sahələrinə tələsən insanlar səhər tezdən dayanacaqlara üz tuturlar. Lakin nəqliyyat xidməti sahəsində yaşanan ciddi çatışmazlıqlar bu gediş-gəlişi çətin sınağa çevirib.
Sakinlər və gündəlik olaraq bu xəttdən istifadə edən tələbələr bildirirlər ki, avtobus tapmaq getdikcə müşkülə çevrilib. Dayanacaqlarda uzun növbələr yaranır, gələn avtobuslara isə minmək demək olar ki, mümkün olmur.
Xeberle.com-un əməkdaşı redaksiyamıza daxil olan çoxsaylı şikayətlər əsasında "20 Yanvar” metrostansiyasındakı dayanacaqda vəziyyəti müşahidə edib. Müşahidələrimizə əsasən deyə bilərik ki, sözügedən vəziyyət Sumqayıt avtovağzalında da səhər və axşam müşahidə olunur. Sərnişin sıxlığı səbəbindən avtobuslara minmək müşkülə çevrilir.
"Yolda qalan” sərnişinlər və "görünməyən” avtobuslar
Bakı–Sumqayıt istiqaməti ölkənin ən sıx sərnişin axını olan nəqliyyat xətlərindən biridir. Hər gün yüzlərlə tələbə dərsə, minlərlə işçi isə iş yerinə çatmaq üçün bu marşrutdan istifadə edir.
Dayanacaqda söhbət etdiyimiz sərnişinlər vəziyyətdən ciddi narazılıq bildiriblər.
"Səhər saat 7-dən dayanacdayam. Gələnlər dolu olur. Nəticədə avtobusa minə bilmirəm və işə gecikirəm” – deyə Sumqayıta işləməyə gedən Rüfət adlı sərnişin bildirib.
"Mən Sumqayıt Dövlət Universitetində oxuyuram. Hər səhər dərsə gecikirəm. Dayanacaqda, sərnişin sayı çox olduğundan ekspress avtovuslarına minə bilmirəm. Dərsə gecikməmək üçün məcbur qalıb taksiyə minirəm – tələbə Aytac Əliyeva söyləyib.
Bəzi sərnişinlər qeyd edir ki, avtobusların bəziləri texniki nasazlıq səbəbindən xəttə çıxmır, çıxanlar isə gecikmələrlə hərəkət edir. Nəticədə 40–50 nəfərlik növbələr yaranır, bu da həm vaxt itkisinə, həm də əsəb gərginliyinə səbəb olur.
Məsuliyyət kimdədir?
Marşrutlara nəzarət edən qurumlar bildirirlər ki, məsələ "araşdırılır”. Lakin vətəndaşlar uzun illərdir eyni açıqlamaları eşitdiklərini deyirlər. Problemin kökündə planlaşdırmanın düzgün aparılmaması, sürücülərin bəzi hallarda reyslərdən yayınması dayanır.
"Görürsən avtobuslar az, amma insanlar çoxdur. Sürücülər də narazıdır, çünki sıxlıq və tıxacda işləmək çətindir. Amma zərəri biz çəkirik” – deyə sərnişinlərdən biri vurğulayıb.
Alternativ yollar var, amma işlədilmir
Sumqayıta gediş üçün Bakı–Sumqayıt elektrik qatarı və ekspress avtobus xətləri mövcuddur. Amma qatarların hərəkət intervalı hələ də sərnişin tələbatına uyğun deyil. Pik saatlarda yerlərin doluluğu səbəbindən bir çox sərnişin qatardan da istifadə edə bilmir.
Avtobusların sayı isə hələ ki, sərnişin tələbatına uyğun deyil. Sərnişinlər bildirirlər ki, nəqliyyat sistemində koordinasiyanın olmaması və marşrutların səmərəsiz planlaşdırılması problemin kökünü təşkil edir.
Sakinlərin və tələbələrin bir tələbi var: rahat və vaxtında gediş-gəliş
Vətəndaşların dediyi kimi, onların istəyi sadədir. Vaxtında, təhlükəsiz və rahat nəqliyyat xidməti. Bu, nə lüks istəkdir, nə də yerinə yetirilməsi mümkünsüz məsələ.
Əgər bu istiqamətdə kompleks və sistemli tədbirlər görülməzsə, "yolda qalan sərnişinlər” problemi yaxın aylarda daha da kəskinləşəcək.
Bakı–Sumqayıt xəttində yaranmış vəziyyət təkcə nəqliyyat problemi deyil, həm də idarəetmə və planlaşdırma çatışmazlığının bariz nümunəsidir. Gündəlik olaraq yüzlərlə tələbə və minlərlə işçi bu xəttdən istifadə edir. Onların hər səhər və axşam qarşılaşdığı çətinliklər təkcə fiziki yorğunluq deyil, həm də ictimai narazılıq yaradır.
İndi növbə məsul qurumlarındır — ya bu məsələni real həll etmək, ya da narazı sərnişinlərin artan səsini eşitməzlikdən gəlmək.
Elşən YƏHYAYEV
Xeberle.com
Xəbərdən istifadə edərkən istinad etmək vacibdir.
