Azərbaycan Respublikasının Vəkillər Kollegiyası Sumqayıt və Şəki "ASAN xidmət” mərkəzlərində vəkil bürolarına vəkillərin tələb olunması ilə bağlı elan verib.
Vəkillər Kollegiyasından Xeberle.com-a bildiriblər ki, bu qurum ilə Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi ilkin mərhələdə Bakı istisna olmaqla Azərbaycanın şəhər və rayonlarındakı "ASAN xidmət” mərkəzlərində vəkil bürolarının açılması barədə razılığa gəliblər. Yaxın günlərdə həmin bürolardan ikisinin Sumqayıt və Şəki şəhərlərində açılması nəzərdə tutulub.
Vəkillər Kollegiyası Sumqayıt və Şəki "ASAN xidmət” mərkəzlərində təsis olunacaq bürolarda (hər mərkəzdə 2 nəfər) işləmək arzusunda olan vəkilləri dəvət edir.
Büroların fəaliyyət istiqamətinə uyğun olaraq, vəkillər yalnız aztəminatlı şəxslərə 20 dəqiqəyədək ödənişsiz şifahi hüquqi məsləhətlər verəcəklər. Digər hallarda isə vəkillər məbləği sərbəst müəyyən edilməklə müqavilələr əsasında məhkəmə və digər təmsilçilik fəaliyyəti ilə məşğul ola biləcəklər.
Sumqayıt və Şəki "ASAN” vəkil bürolarında işləmək və büroların təsisçisi olmağı arzulayan vəkillər ən geci oktyabrın 20-dək bu barədə Vəkillər Kollegiyası Rəyasət Heyətinin aparat rəhbəri Fərhad Nəcəfova (+994 70 216-72-03) məlumat verə bilərlər.
Seçimdə vəkilliyə yeni qəbul olunmuş üzvlərə üstünlük veriləcək.
Xəbərdən istifadə edərkən istinad etmək vacibdir.
