AMEA nəzdində Respublika Seysmoloji Xidmət Mərkəzində il ərzində aparılan elmi və elmi-istehsalat işlərinin nəticələrinə dair şöbələr üzrə hesabatların təqdimatı başlayıb.
Xeberle.com xəbər verir ki, RSXM-nin Elmi-Texniki Şurasının iclasında çıxış edən baş direktor, AMEA-nın müxbir üzvü Qurban Yetirmişli əvvəlcə Moskvada keçirilən "EcoWorld-2018” Beynəlxalq Ekoloji müsabiqəsi haqqında məlumat verərək, bu müsabiqədə mərkəzin də iştirak etdiyini bildirib. Sürüşmələr üzrə aparılan tədqiqatların nəticəsinə görə Respublika Seysmoloji Xidmət Mərkəzinin müsabiqədə iştirak edən ölkələr arasında birinci yerə çıxmasını kollektiv üçün böyük uğur adlandıran baş direktor daha sonra gündəliyi elan edib.
Qeyd edək ki, iclasda RSXM-nin "Zəlzələlərin tədqiqatı bürosu"nun rəisi Səidə İsmayılova "Azərbaycan və ətraf bölgələrin seysmikliyinin tədqiqi", "Zəlzələ ocaqlarının dinamikası" şöbəsinin müdiri, geologiya-mineralogiya üzrə fəlsəfə doktoru, dosent Səbinə Kazımova " Zəlzələ ocaqlarının tədqiqi və Beynəlxalq Seysmotomoqrafiya laboratoriyasının fəaliyyəti", "Seysmoloji materialların təhlili və təfsiri" şöbəsinin müdiri Rasimə Abdullayeva "Seysmik məlumatlar əsasında zəlzələlərin xəbərverici əlamətlərinin tədqiqi, zəlzələlərin və partlayışların müqayisəli analizi", "Makroseysmik tədqiqatlar" şöbəsinin müdiri, geologiya-mineralogiya üzrə fəlsəfə doktoru, dosent Etibar Qaravəliyev "Hiss olunan zəlzələlərin makroseysmik tədqiqi", "Maqnitometriya" şöbəsinin böyük elmi işçisi Nadirşah Xanbabayev "2018-ci ildə Şəki-Şamaxı, Talış Kürətrafı və Xəzəryanı-Quba vilayətində qravimaqnito-metrik tədqiqatlar", "Qravimetriya" şöbəsinin müdiri Elçin Bağırov "2018-ci ildə stasionar və diskret qravimetrik tədqiqatlar", "Geodinamika" şöbəsinin müdiri, geologiya-mineralogiya üzrə fəlsəfə doktoru, dosent İlyas Kazımov " Azərbaycan ərazisinin GPS məlumatların əsasında geodinamikası" mövzusunda illik hesabatları təqdim ediblər.
Bildirilib ki, il ərzində Azərbaycandakı 35 seysmotelemetrik stansiyalar vasitəsi ilə 7000-ə yaxın zəlzələ qeydə alınib. Onlardan 4000-ə yaxını Azərbaycan və ona bitişik ərazilər, 3000 -ə yaxını isə uzaq zəlzələlərdir. Azərbaycan ərazisində 3346 zəlzələ qeydə alınıb ki, onlardan ən güclüsü iyun ayında Zaqatalada baş verən maqnitudası 5.5 olan zəlzələ olub. Bu zəlzələ episentrdə 6 bal, ətraf ərazilərdə 3-4 bal gücündə hiss olunub. Hesabatlarda həmçinin il ərzində respublika ərazisində seysmik aktivlik, zəlzələ ocaqlarının vəziyyəti, baş verən zəlzələlərin mexanizmləri və s. kimi məsələlər haqqında ətraflı məlumatlar verilib.
Müzakirələrdən sonra AMEA Geologiya və Geofizika İnstitutunun şöbə müdiri, akademik Əkbər Feyzullayev, AMEA-nın müxbir üzvü, geologiya-mineralogiya elmlər doktoru Çingiz Əliyev və digərləri çıxış edərək təqdim edilən hesabatları müsbət qiymətləndirmiş, həmçinin elmi tədqiqatların sahəsinin genişləndirilməsinə dair öz təkliflərini veriblər.
Xəbərdən istifadə edərkən istinad etmək vacibdir.
