Xeberle.com-a verilən məlumata görə, anım mərasiminə şəhidin ailə üzvləri, yaxınları "Azərkimya” İB-nin sosial inkişaf şöbəsinin rəisi Fikrət Əliyev, YAP Sumqayıt Şəhər Təşkilatı Qadınlar Şurasının sədr müavini Nəzakət Dadaşova, Sumqayıt Şəhər Regional Mədəniyyət İdarəsinin məsləhətçisi Eldar Hüseynov, şəhidin vaxtilə təhsil aldığı 16 saylı tam orta məktəbin, "Təfəkkür" liseyinin müəllim və şagird heyəti, Qubadlı Rayon Tarix-Diyarşunaslıq Muzeyinin əməkdaşları iştirak ediblər.

Muzeyin əməkdaşı Səidə Səfərova anım mərasiminə toplaşanları muzeyin "Şəhidlər Qalereyası”nda nümayiş olunan sumqayıtlı şəhidlərin şəxsi arxivlərinin toplandığı daimi ekspozisiya ilə tanış edib.

Muzeyin elmi katibi Sənurə Lazımova Akif Mahmudovunşərəfli döyüş yolu haqqında ətraflı məlumat verib.

Digər çıxış edənlər - şəhidin ailə üzvləri, Sumqayıt şəhər Regional Mədəniyyət İdarəsinin məsləhətçisi Eldar Hüseynov, muzeyin direktoru Olya İslamova, 16 saylı məktəbin direktoru Niyaz Süleymanov və şəhidin cəbhə yoldaşı Maarif Musaoğlu şəhidin əsl vətənpərvərlik, qəhrəmanlıq nümunəsi göstərdiyindən danışıb.

Bildirilib ki, A. Mahmudov 2005-ci ildə Prezident İlham Əliyevin sərəncamı ilə "Azərbaycan bayrağı” ordeni ilə təltif olunub.

Anım mərasimində məktəb şagirdlərinin ifasında vətənpərvərlik mövzusunda şeirlər səsləndirilib.

Sonda şəhidin şəxsi arxivi əsasında tərtib olunmuş sərgi, mövzu ilə əlaqədar videoçarx iştirakçılara təqdim olunub.