"Gəlin hər ayın bir gününü şəhərimizdə maşınsız gün elan edək. Həmin gün ictimai nəqliyyat, təcili tibbi yardım, fövqəladə hallar, Sumqayıtdan digər yerlərə səfərlər istisna olmaqla - vacib ehtiyac duyulmadığı təqdirdə - heç kim maşınını qarajından, həyətindən çıxarmasın."
Xeberle.com xəbər verir ki, bu sözləri Sumqayıtın mövcud ekoloji durumuna diqqət yönəldən Əməkdar jurnalist Rafiq Oday söyləyib.
R. Odayın sözlərinə görə, Sumqayıtın ekologiyasına mənfi təsir göstərə biləcək bir şey varsa - o da şəhərdəki maşınlar, minik avtomobilləridir: "Son illər Sumqayıtda minik maşınlarının sayı 10-15 il bundan oncə ilə müqayisədə on dəfələrlə artıb. Az qalır ki, hərənin bir maşını olsun. Sumqayıt zəhmətkeşlər şəhəri olduğundan, burada yaşayan insanlar əsas etibarilə quru maaşa göz dikən adamlardı və yeni, müasir və bahalı avtomobil almaq imkanları yoxdur. Ona görə də ucuz qiymətə ili köhnə olan maşınları alırlar ki, bunlar da ekoloji cəhətdən zərərli, havanı zavodlardan belə artıq dərəcədə çirkləndirən maşınlardır".
Əməkdar jurnalist fikirlərini bu sözlərlə davam etdirib: "Gəlin hər ayın bir gününü şəhərimizdə maşınsız gün elan edək. Həmin gün ictimai nəqliyyat, təcili tibbi yardım, fövqəladə hallar, Sumqayıtdan digər yerlərə səfərlər istisna olmaqla - vacib ehtiyac duyulmadığı təqdirdə - heç kim maşınını qarajından, həyətindən çıxarmasın. Həmin günü piyada gəmək günü elan edək. Həm şəhərimiz bir gün rahat nəfəs alsın, həm də insanlarımız.
Və gələcəkdə belə günlərin sayı artırılsın - ayda heç olmasa iki dəfə olmaqla bu addım atılsın. Nə qədər ki, dünyanın böyük və nəhəng şəhərləri bizdən qabağa düşməyib, gəlin biz onlara örnək və nümunə olaq".
Xəbərdən istifadə edərkən istinad etmək vacibdir.
