2014-cü ilin yanvar ayında Azərbaycanın 3 həyat sığortası şirkəti tərəfindən könüllü həyat sığortası üzrə  11 milyon 913 min 709 manat sığorta haqqı toplanıb, bu da 2013-cü ilin yanvarı ilə müqayisədə 4 milyon 882 min 361 manat və ya 69,4% çoxdur.

Könüllü həyat sığortası üzrə yığımların 11 milyon 62 min 556 manatı və ya 93%-i həyatın yaşam sığortasının payına düşüb.

Ötən ilin yanvarı ilə müqayisədə həyatın yaşam sığortası (həyatın yığım sığortası məhsulu - əməkhaqqının tam və ya bir hissəsi yığıma yönəldilir) üzrə yığımlar 4 milyon 336 min 747 manat və ya 64,5% artıb.

Həyatın ölüm halından sığortası növü üzrə də yığımlar artıb, belə ki, ötən ilin yanvarında bu növ üzrə yığımlar 299 min 611 manat təşkil edibsə, cari ilin yanvarında təxminən 2,8 dəfə çox, yəni  843 min 39 manat sığorta haqqı toplanıb.

Sağalmaz xəstəliklərdən sığorta üzrə yığımlar 8113 manat təşkil edib, bu da 2013-cü ilin yanvarı ilə müqayisədə 37%  çoxdur.

Ötən ilin yanvarı ilə müqayisədə könüllü həyat sığortası üzrə ödənişlər 10 dəfə artaraq 770 min 236 manat təşkil edib.

Həyat sığortası şirkətləri icbari həyat sığortası üzrə (İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığortası) 1 milyon 302 min 730 manat sığorta haqları toplayıblar.

Bu da 2013-cü ilin yanvarı ilə müqayisədə 405 min 178 manat və ya 31% çoxdur. İcbari həyat sığortası üzrə ödənişlər isə 184 min 117 manat olub və 2013-cü ilin yanvarı ilə müqayisədə 3,4 dəfə çoxdur.

Qeyd edə ki, Azərbaycanda həyatın yığım sığortası üzrə bir sıra vergi güzəştləri nəzərdə tutulub. İşçi  əməkhaqqını tam və ya müəyyən hissəsini həyatın yığım sığortasına yönəldərsə, həmin məbləğə görə gəlir vergisi ödənilmir. Bundan başqa, 3 ildən sonra sığorta şirkətinin sığorta olunana ödəyəcəyi məbləğdən də gəlir vergisi tutulmur.

Bu sərfəli şərtlərlə maaşını həyat sığortasına sərmayə edənlərin sayı artır

/Marja.az/