Ötən əsrin bu üç məşhur qadınlarının taleyindəki oxşarlıq təəccüb doğurmaya bilməz... Onların üçü də inanılmaz uğur əldə edib, həyatlarında baş verən hadisələrə biganə qalmayıblar və ömürlərinin faciəvi sonluğunu hiss ediblər. Bu dəhşətli sonluğun üçü də avtomobillə bağlıdır.
"Uşaqlarına ağlayan Niobeya”
Aysedora Dunkan - XIX əsrin sonu, XX əsrin əvvəllərinin ən istedadlı rəqqasəsi hesab edilir. Amma insan bəzən həyatın qəribə və amansız qanunları ilə üz-üzə qalmalı olur: rəqqasənin taleyinə istedad və uğura görə qəddarcasına cavab vermək düşür... Onun qismətinə döğma övladlarının faciəsini yaşamaq və sonda öz ömrünü də mənasız bir sonluqla bitirmək düşübmüş...
Hələ 1905-ci ildə xiromantiya (əl cizgiləri ilə taleyi oxumaq ) ilə məşğul olan rus rəssamı L. Bakst Aysedoraya böyük şöhrət qazanacağını və iki sevimli varlığını itirəcəyini xəbər vermişdi. Dunkanın iki nikahdankənar övladı vardı: teatr rejissoru olan Qordon Kreqin qızı Deydra və Parisin məşhur milyonçusu, tikiş maşını fabrik sahibi Yudcin Zingerin varisi olan oğlu Patrik...
Aktrisa 1913-ci ilin yanvarında Rusiyaya qastrola yollanır. Orada Aysedoranı dəhşətli qarabasmalar təqib etməyə başlayır: gah həzin dəfn marşının sədalarını eşidir, gah məzar üstünə aparılan gül qoxusunu hiss edir, gah da gözü önünə iki balaca uşaq məzarlığı görsənirdi. Bəzən gecələr rəqqasə çarpayısının yanında qəmli gözləri ilə ona baxan qara paltarlı qadınlar görürdü. Dunkanın bu qarabasmaları onu o qədər narahat edir ki, hətta həkimə müraciət etməli olur. Təəssüf ki, bədbəxtlik duyğusu elə-belə deyilmiş. Aysedora Rusiya səfərindən sonra Parisə qayıdır. Bir dəfə rəqs studiyasında olarkən, onun qarşısından üç qara pişik keçir. Qrim otağına qayıdan aktrisa kim tərəfindənsə unudulan "Uşaqlarını ağlayan Neobeya" adlı kitab görür. Bunun yaxşı əlamət olmadığını hiss edən rəqqasəyə tezliklə Zinger dəhşətli bir xəbəri gətirir. Aysedoranın hər iki övladı avtomobilin nasazlığı üzündən qəzaya uğrayaraq həlak olurlar. Aysedora qalan ömrünü övladlarına ağlamaqla keçirir və sonda özünün ölümünü də övladlarının faciəsi kimi sanki özü planlaşdırır.
14 sentyabr 1927-ci ildə məşhur rəqqasə Nitse şəhərində konsert verməli idi. Hava kifayət qədər soyuq olsa da Aysedora palto geyinmir, əvəzində al-qırmızı rəngli uzun şərfi boğazna dolayır. Deyilənlərə görə, avtomobilə minməzdən əvvəl, aktrisa onu yola salan salan pərəştişkarlarına səslənib: "Dostlar, əlvida! Mən şöhrətə doğru gedirəm"! Maşın yerindən tərpənəndə, nə Aysedora, nə də sürücü şərfin bir ucunun təkərin oxuna ilişdiyini görməyirlər. Şərf dartılaraq, bir anda rəqqasəni boğur. Yəqin ki, Dunkan nə baş verdiyini heç anlamağa macal tapmır. Ölüm həmin anda onu haqlayır. Deyirlər ki, o, sanki ölümə getdiyini hiss etmişdi....
Görücü şahzadə
Gözəl Qreys Kelli tarixə "Oskar" mükafatı almış amerikalı kinoaktrisa, həmçinin Monako şahzadəsi III Renyenin xanımı kimi düşmüşdü. Lakin Qreys Kelli ilə bağlı elə faktlar var ki, onlar az adama məlumdur. O, qəribə altıncı hissə malik idi və hətta əvvəlcədən bilirdi ki, həyatı faciəli şəkildə kəsiləcək. Yaxınlarının dediklərinə görə, şahzadə Qreys təbii fəlakətləri qabaqcadan hiss edir, doğmalarına üz verəcək bədbəxtlikləri əvvəlcədən duyurdu. Hadisələrin mənzərəsi xəyal kimi gözəl aktrisanın gözləri önündə sadəcə canlanırdı. Əgər onun övladları yıxılıb əzilirdilərsə, Qreys uşağın zədə aldığı yerdən ağrı hiss edirdi. Bir dəfə şahzadə çox həyəcanlanır və evdə bildirir ki, onun anası ilə nə isə bədbəxtlik baş verib, onu xəstəxanaya aparırlar. Amerikaya zəng edirlər, lakin ona bildirirlər ki, yaşlı qadınla hazırda hər şey qaydasındadır. Lakin bu onu sakitləşdirmir. Qreysin naharatçılığı keçmir... Ertəsi gün biləndə ki, dünən şahzadənin anasının beyninə qan sızıb, onu klinikaya göndəriblər, hamı təəəccüblənir. Şahzadənin yaxınları sadəcə bundan gec xəbər tuturlar.
.jpg)
Qreys öz ölümünü də qabaqcadan görmüşdü . İki il ərzində erkən ölüm haqda fikirlər onu daim iizləyirdi. Şahzadə dəfələrlə deyirdi ki, ölüm ona çox yaxındır və bu hadisə Monakoda olacaq. Qreys dəfələrlə özünü tabutda görürdü, uşaqları isə analarının cəsədi üzərində ağlayırdılar. Düzdür, ölümün necə baş verəcəyi şahzadəyə bəlli deyildi... 13 sentyabr 1982-ci ildə Qreys öz kiçik qızı Stefanya ilə birlikdə maşında gedirdi. Şahzadə özü "Rover"in sükanı arxasında olur. Qəfildən insult keçirən Qreys avtomobilin idarə etməsini itirir, maşın yoldan çıxaraq, dərəyə yuvarlanır. Qreysi əzilmiş avtomaşında çıxardanda, hələ sağ idi. Şahzadə ertəsi gün hospitalda, şokdan ayılmayaraq, dünyasını dəyişir. Boyun fəqərəsi sınan qızı Stefaniyanı isə xilas etmək mümükün olur.
Dəhşətli avqust...
1981-ci il iyulun 29-də dünyanın ən möhtəşəm və dəbdəbəli toyu baş tutur: Müqəddəs Pavel kilsəsində Britaniya tacının varisi şahzadə Çarlz və 20 yaşlı gözəl Diana Spenser evlənirlər. Bütün dünyaya yayımlanan bu toyda 2650 qonaq iştirak edirdi. Lakin bu qonaqların heç birinin xəbəri olmur ki, məhz həmin gün Bolqarıstanda, günəş işığından məhrum olan məşhur görücü Vanqa pəncərəyə tərəf dönərək: "Bu toy qızı öldürəcək, deyə aydın şəkildə bəyan edir. "Biz birlikdə öləcəyik. O, mənim ölümüm haqqında eşidəcək, amma biz bir yerdə öləcəyik.”
Diana 1961-ci il iyulun 1-də anadan olub. Və məhz iyul onun bütün həyatı boyunca illərinin ən xoşbəxt ayı olub. Ailə həyatında da bütün xoşbəxt günləri bu ay ilə bağlıdır: Çarlz ilə toyu – 29 iyul 1981-ci, bir il sonra yenə də iyulda şahzadə Uilyamın dünyaya gəlməsi.
Avqust ayı isə əksinə, ona həmişə bədbəxtlik gətirirdi. Şahidlərin dediyinə görə, 28 avqust 1996-ci ildə ailə həyatı rəsmən dağıldıqdan sonra, Diana ağlayıb və deyib: "Bu, dəhşətli aydır. O məni uşaqlıqdan sıxır. Yəqin ki, elə avqustda da mən öləcəyəm”. Bir il sonra yayın son günü artıq o, həyatda olmur... Diana ölümündən bir qədər əvvəl 1996-ci il oktyabr tarixli məktubunda yazır: "Mən həyatımın ən dəhşətli dönəminə qədəm qoymuşam. İndi nə desən ola bilər. Məsələn, maşınımda əyləcin nasazlığı, qəza və ölüm. Bu Çarlza Kamilla ilə evlənmək imkanı verə bilər".
Ledi Di üzərində kabus kimi dolaşan təhlükəni çox həssaslıqla duyurdu və hisslərini bu məktubda kağıza köçürübmüş... 31 avqust 1997-ci ildə səhər saatlarında Diana Parisdə Pont de l'Alma tunelində yol qəzasında ölümcül yaralanır. Qəzada onunla birlikdə olan sevgilisi Dodi Fayed və sürücü Henri Paul da həyatlarını itirirlər. Diana Fayedin Conikal adlı ailə yaxtasında Fransız və İtalyan Rivierasında onunla doqquz günlük tətildən sonra Londona qayıdırdı. 2 saat ərzində həkimlər ölümcül yaralanmış Diananın həyatını xilas etməyə çalışdılar. Lakin saat 4-də Şahzadə Diana dünyasını dəyişir. Fransa məhkəməsinin ilkin tədqiqatları qəzanın Henri Paulun içkili olması və idarəetməni itirməsi səbəbindən baş verdiyi məlumatı ilə nəticələnir.
Atalar üçdən deyib...
Diqqətlə baxdıqda, Aysedora Dunkan, Qreys Kelli və şahzadə Diananı təkcə faciəli sonluq birləşdirmədiyini görmək olar. Onların həyatında ümumi cəhətlər çoxdur. Məsələn, Qreys və Diana izdivacları sayəsində şahzadə titulu qazanıblar. Qreys və Aysedora hər ikisi şou-biznes ulduzları olublar. Aysedora və Diananın sevgidə bəxtləri gətirməyib. Dunkan bir çox uğursuz məhəbbət romanı yaşayıb, yalnız onlardan biri - Sergey Eseninlə olan sevgisi qanuni nikahla başa çatıb və bu nikah da uğursuz olub. Diana isə uzun illər əri şahzadə Çarlz tərəfidən soyuqluğa dözmək məcburiyyətində qalıb, Dodi əl - Fayedlə olan qısa müddətli xoşbəxt sevgisi isə faciəli şəkildə yarımçıq qalıb. Deyirlər, atalar üçdən deyib. Yəqin ki, XX əsrin üç görkəmli xanımının həyatındakı bu qədər bənzərlik, təkrarlanan hadisələr təsadüfi deyildi. Amma bütün bunların gizli mənası adi insan şüuru üçün çətin ki, nə vaxtsa açılacaq. (analitik.az)
Xəbərdən istifadə edərkən istinad etmək vacibdir.
