Xəbər verdiyimiz kimi, Rusiya artıq birdəfəlik plastik qabların istifadəsindən imtina edəcək. Bu barədə Rusiya Ekologiya Nazirliyinin rəhbəri Dmitriy Kobılkin danışıb. Nazir bildirib ki, ətraf mühitin çirklənməsinin qarşısını almaq üçün plastik materiallardan hazırlanan məhsullardan istifadənin qadağan edilməsi zəruridir.
Ölkəmizdə də plastik məhsullardan kifayət qədər çox istifadə edilir. Bəs bu məhsulların Azərbaycanda da qadağan edilməsi gözlənilirmi?
Məsələ ilə bağlı Azad İstehlakçılar Birliyinin (AİB) sədri Eyyub Hüseynov BiG.AZ-a açıqlama verib. O bildirib ki, vətəndaşlar hələ ki bu işlərə hazır deyil:
"Baxmayaraq ki, plastiklərdən xilas olmaq barədə xeyli təbliğat işləri aparılıb, lakin Azərbaycan vətəndaşları hələ ki bu işlərə hazır deyil. Bu işdə biznes qurumları, istehlakçılar, dövlətlə birlikdə işləməli və qarşılarına məqsəd qoymalıdırlar ki, ölkəmizi, planetimizi təmiz saxlayaq. Həmçinin bu yöndə ciddi işlər getməlidir. Məsələn, bəzi şirkətlər, istehsalçılar nümunəvi addım ataraq, plastik torbaları xeyli dərəcədə incəldib, müxtəlif çağırışlar edərək bu torbalardan istifadə etməməyə çağırıb, kağız tullantılar toplayıblar və s. Lakin digər marketlərdə biz nəinki qalın torbalar görürük, hətta onların üzərində müxtəlif reklamlar görürük.
Hələ 2009-cu ildə AİB xüsusi layihə keçirərək, ətraf mühitin necə çirkləndiyini dövlət orqanları və istehsalçılar qarşısında müzakirəyə çıxarılıb. Orada bildirilib ki, plastik torbalara məhsul qablaşdıran bütün müəssisələr dövlət büdcəsinə müəyyən vergi ödəsin və ətraf mühitin qorunmasına kömək olsunlar. Lakin təəssüf ki, bu məsələ hələ ki həyata keçirilməyib”.
Eyyub Hüseynov həmçinin plastiklərdən qurtulmağın yolundan danışıb:
"Bu sahədə əvvəlcə MDB ölkələri təcrübəsindən yararlanmaq lazımdır. Həmin ölkələrdə şəffaf, son dərəcə nazik torbalar istifadə edilir və bunlar pulla satılır. Birinci addım olaraq bizdə də bu torbalar pulla olmalıdır. Bütün supermarketlər, marketlər hamısı bu sistemə keçməlidirlər.
Bundan sonra ikinci addım olaraq əhalinin bazar tobalarına keçməsi vacibdir. Çünki dünya bu zibilxananın içərisində batıb gedir. Dünyanın ən gözəl çayları, okeanları bu tullantılarla dolub, bərbad haldadır. Təsadüfi deyil ki, bir uşaqdan soruşsan ki, inəklər nə yeyir. cavabında deyir ki, sellofan torba yeyir”.
Plastik torbaların pullu olacağı təqdirdə bunu əhalinin bunu necə qarşılayacağı haqda ekspert bildirib ki, bu, əhaliyə plastik torbalardan imtina etməkdə stimul verəcək:
"Əhali arasında necə qarşılanacağından asılı olmayaraq, bu, onların bazar torbalarına keçirilməsinə stimul verəcək. Həm də marketlərdəki plastik torbalar onsuz da bizə pulsuz verilmir. Sadəcə, biz onu görmürük, çünki aldığımız mallardan çıxılır”.
"Plastik torbalardan xilas olmaq üçün Azərbaycanda dünyanın heç bir yerində olmayan alternativ var” - deyə o bildirib.
Plastik torbalardan xilas olmaq üçün Azərbaycanda dünyanın heç bir yerində olmayan alternativ var. Bu da Talış zənbilləridir. Mən özüm də daima ondan istifadə edirəm və hər kəsə tövsiyyə edirəm. Hətta bu zənbilləri xarici bazara belə çıxarmaq olar. Ekoloji, təmiz, təbiətdə tez həll olunan və görüntü baxımından da gözəl”.
Xəbərdən istifadə edərkən istinad etmək vacibdir.