Sumqayıtda yerləşən Qubadlı Rayon İcra Hakimiyyətinin akt zalında 2019-cu ilin altı ayının sosial-iqtisadi inkişafının yekunlarına və qarşıda duran vəzifələrə həsr olunmuş yığıncaq keçirilib.
Hesabat məruzəsində Qubadlı sakinlərinin məskunlaşma yerlərində yaşayış şəraitinin yaxşılaşdırılması istiqamətində görülən işlərdən ətraflı bəhs olunub. Bildirilib ki, Abşeron rayonunun "st. Sumqayıt” adlanan ərazisində və Sumqayıt şəhərinin 12-ci mikrorayonunda məcburi köçkünlər üçün inşa edilmiş şəhərciklərdə məcburi köçkün ailələrinin yeni mənzillərə köçürülməsi işi tam başa çatdırılıb. 2082 ailənin yaşayışı üçün nəzərdə tutulan qəsəbələrdə əsasən Qubadlı rayonundan olan məcburi köçkünlər məskunlaşıb. Abşeron rayon "st. Sumqayıt” adlanan ərazidəki şəhərcikdə rayonun Hal kənd, Dəmirçilər kənd və Qəsəbə 4 saylı tam orta məktəbləri, Gigiyena və Epidemiologiya Mərkəzi, 140 yerlik Qubadlı şəhər 1 saylı körpələr evi-uşaq bağçası və rayon rabitə qovşağının poçt agentliyi fəaliyyətə başlayıb. Nəticədə 50 nəfər məcburi köçkün işlə təmin edilib. Eyni zamanda, şəhərcikdə keçirilən qəbullar zamanı vətəndaşların çoxsaylı müraciətləri nəzərə alınaraq sakinlərin əmək haqlarının, təqaüdlərinin və yemək xərci-müavinətlərinin rahat şəkildə almaları üçün ərazidə "Kapital Bank”ın bankomatı quraşdırılıb. Bu da şəhərcikdə məskunlaşan rayon sakinlərinin, həmçinin digər rayonlardan olan məcburi köçkünlərin rahatlığını təmin edib.
Məruzədə məcburi köçkünlərin mənzil-məişət şəraitlərinin yaxşılaşdırılması, kommunal problemlərinin həlli istiqamətində görülmüş işlər diqqətə çatdırılaraq qeyd edilib ki, rayon icra hakimiyyətinin yaxından iştirakı ilə Sumqayıt şəhərinin 40-cı məhəlləsində məcburi köçkünlərin məskunlaşdığı 2 ədəd beşmərtəbəli binaya dam örtüyü vurulub, həyətə asfalt örtüyü döşənib. Sakinlərin çoxsaylı müraciətləri əsasında Sumqayıt şəhər "Yaşıldərə” yaşayış massivində və bir neçə yerdə məhəlləarası yollara asfalt örtüyü döşənib, bu istiqamətdə işlər davam edir.
Hesabatda Səfərbərlik və Hərbi Xidmətə Çağırışı üzrə Dövlət Xidmətinin rayon bölməsi tərəfindən yanvar, aprel və iyul çağırışlarında 115 nəfərin hərbi xidmətə göndərildiyi, 629 gəncin ilkin hərbi qeydiyyata alındığı, 6 gəncin isə könüllü olaraq müddətdən artıq həqiqi hərbi xidmətə yollandığı qeyd olunub.
Yığıncaqda Prezident İlham Əliyevin dövlət strukturlarının qarşısında qoyduğu vəzifələrdən də bəhs olunaraq bildirilib ki, bu vəzifələrin yerinə yetirilməsi üçün rayonun bütün idarə, müəssisə və təşkilatları qüvvələri səfərbər edərək səylə çalışacaqlar.
Məruzədə təhsil, səhiyyə, idman, gənclər və rayon həyatını əhatə edən bir sıra sahələrdə görülən işlər də təhlil edilib.
Məruzə ətrafında çıxışlarda natiqlər fəaliyyət sahələri üzrə rayon ictimaiyyətinə məlumat verib, bir sıra təkliflər irəli sürüblər.
Sonda çıxış edən rayon icra hakimiyyətinin başçısı Malik İsaqov ölkəmizin sosial-iqtisadi, mədəni inkişaf sahələrində yeni-yeni uğurlar qazanmasının bir ənənəyə çevrildiyini, bu inkişafın təməlində Prezident İlham Əliyevin yürütdüyü şaxələndirilmiş iqtisadi siyasətin, yaradılan daxili sabitliyin dayandığını vurğulayıb. Qubadlıların Prezident İlham Əliyevin Azərbaycan dövlətinin hərtərəfli inkişafı, əhalinin güzəranının yaxşılaşması üçün həyata keçirdiyi səmərəli və qətiyyətli siyasəti dəstəklədiklərini bildirən M.İsakov bir sıra vacib məsələlərə toxunub, vətəndaş məmnunluğunun prioritet məsələ olduğunu diqqətə çatdırıb.
Sonda rayonun icra strukturları qarşısında qoyulan vəzifələrin uğurla yerinə yetirilməsi üçün konkret tapşırıqlar verilib və gündəlikdəki məsələ ilə bağlı qərar layihəsi qəbul edilib.
Xəbərdən istifadə edərkən istinad etmək vacibdir.
