Türkiyənin artıq ölkə rekordlarını qıran “Möhtəşəm yüz il” filminin 123-ci seriyası bütün izləyənləri təəssüf içində qoymaqla yanaşı etirazlara da səbəb olub. Bursa vilayətinini sakini Həsən Köz adlı şəxs filminin sonuncu hissəsindən təsirlənərək, Sultan Süleyman Qanunini cinayətdə ittiham edib. Silsilə filmin sonuncu hissəsində Sultan Süleyman ətrafında olan bəzi adamların yalanlarına uyaraq, oğlu Şahzadə Mustafanı boğaraq gözləri qarşısında öldürür. Həsən Közün də qəzəbinə məhz bu hadisə səbəb olub. O, Bursada polisə gedərək Sultan Süleymanı məhkəməyə verib və onun bir padşah kimi legitimliyinin ləğv edilməsi tələbi ilə baş prokurorluğa müraciət ünvanlayıb.

Mustafanın ölümü sosial şəbəkələr də ciddi narazılığa səbəb olub. Türkiyə tarixçiləri isə filmdə təhriflərin olduğunu deyirlər. Onların iddialarına görə, Sultan Süleyman oğlu Mustafanı heç də Hürrəm Sultanın oyunlarına uyub öldürməyib, bu onun öz qərarı olub. Sultan Süleyman oğlu Mustafanı izlətdirmiş və onun Səfəvi şahına yazdığı məktubları ələ keçiribmiş. Həmin məktublarda şahzadə Mustafa atasının qocaldığını və onun taxta çıxmaq vaxtının yetişdiyini yazırmış.

Filmin məhz bu hissəsinin çəkilişində 1000 nəfərdən çox adam düz 15 gün məşq edib. Filmdən sonra qəbri Bursada olan Şahzadə Mustafanın türbəsini ziyarət edənlərin sayı artıb. Təkcə Türkiyədə deyil, dünyada və eyni zamanda ölkəmizdə ən çox izlənilən filmlər sırasında olan filmin bu hissəsidir. (anspress.com)