Sumqayıt şəhərində sərnişin avtobus sürücüsünün sükan arxasında təhlükəli davranışı yerli sakinin haqlı narazılığına səbəb olub.
Şikayətə əsasən, hadisə avqustun 5-də 16-cı mikrorayon, İsmət Qayıbov küçəsində qeydə alınıb. Şəhər sakini 50 AF 379 dövlət qeydiyyat nömrəli 7 nömrəli avtobusa minərkən sürücünün məsuliyyətsiz davranışlarının şahidi olub. Onun sözlərinə görə, avtobus normalda Kolxoz bazarı deyilən əraziyə 30 dəqiqəyə çatmalı olduğu halda, sürücü məsafəni cəmi 15 dəqiqəyə qət edib. Sürət həddini aşmaqla yanaşı, sürücü eyni vaxtda telefonda danışıb, siqaret çəkib və enerji içkisi qəbul edib.
Şikayətçi məsələ ilə bağlı dəfələrlə Sumqayıt Şəhər İcra Hakimiyyətinin nəqliyyat departamentinə müraciət etdiyini, lakin heç bir tədbirin görülmədiyini bildirib. O, sərnişindaşıma xidmətində ciddi nəzarət mexanizminin tətbiq edilməsini, xüsusən də sürücülərə nəzarət üçün avtobuslarda kameraların quraşdırılmasını təklif edir.
Məsələ ilə bağlı Azərbaycan Yerüstü Nəqliyyat Agentliyidən (AYNA) Xeberle.com-a bildirilib ki, sürücülərin sükan arxasında mobil telefondan istifadə etməsi yalnız qayda pozuntusu deyil, həm də sərnişinlərin həyatı üçün birbaşa təhlükə yaradır. AYNA-nın məlumatına görə, bu cür hallarla bağlı inzibati tədbir görmək onların səlahiyyətinə daxil olmasa da, qeyd olunan marşrut xətti üzrə daşıyıcıya sürücünün davranışının araşdırılması və müvafiq tədbirlərin görülməsi barədə tapşırıq verilib.
Agentlik əlavə edib ki, sərnişindaşıma sahəsində təhlükəsizliyin təmin olunması, qaydalara riayət və uşaqların konduktor kimi işlədilməsinin qarşısının alınması ilə bağlı daşıyıcılara mütəmadi olaraq xəbərdarlıqlar edilir.
Xəbərdən istifadə edərkən istinad etmək vacibdir.
