Dünən Sumqayıtda Qarabağ əlilinin özünü yandırmağa cəhd göstərməsi ilə bağlı portalımıza məlumat daxil olub. Yayılan xəbərlərlə əlaqədar bildirilir ki, I qrup Qarabağ əlili Malik Məcidov sərxoş vəziyyətdə şəhər icra hakimiyyətinə gələrək ona mənzil növbəsinə götürülməsi ilə bağlı müraciət edib (sonradan Sumqayıt şəhər Polis İdarəsi M.Məcidovun sərxoş olmasını təsdiqləyib). Orada Malik Məcidova ona 2007-ci ildə şəhid ailələri və Qarabağ əlilləri üçün Sumqayıt şəhərində inşa edilmiş binada mənzil verildiyi, 2010-cu ildə isə bu mənzilin onun tərəfindən satıldığı diqqətinə çatdırılıb və Mənzil Məcəlləsinin tələblərinə uyğun olaraq mülkiyyətində olduğu mənzilin satıldığı gündən yalnız 5 il keçdikdən sonra mənzil növbəsinə götürülə biləcəyi bildirilib. Verilən məlumata görə bundan əlavə, Malik Məcidovun həyat yoldaşı İradə Süleymanovanın adına Sumqayıt şəhəri 19-cu məhəllə, ev 9/20-də 18 saylı mənzil mövcuddur. Bu mənzildə kirayə yaşayan Natavan Bağırova adlı şəxs hər ay Malik Məcidova 200 manat verdiyini bildirib. Əlavə olaraq, Malik Məcidova hal-hazırda yaşadığı Xəzər bağlarında 7 sot ərazisi olan fərdi yaşayış evi məxsusdur və o, Qarabağ əlili kimi təqaüd alır.

Məsələylə əlaqədar, Sumqayıt şəhər İcra Hakimiyyəti ilə əlaqə saxladıq. Oradan verilən məlumata görə, hər hansı özünü yandırma faktı qeydə alınmayıb. Şəhər İcra hakimiyyətindən bildirilib ki, şəhid ailələrinə, Qarabağ əlillərinə və bu kateqoriyadan olan insanlara böyük hörmətlə yanaşılmalı və onların adları ətrafında siyasi spekulyasiyalara yol verilməməlidir.

Xeberle.com