Azərbaycan çağdaş dövlətçilik tarixinə nəzər salanda vaxtilə yüksək postlar tutanların siyahısında elm xadimlərinin adlarına da rast gəlinir. Onların bəziləri müstəqilliyin ilk illərində, bəziləri isə sonradan elmi fəaliyyətlə məşğul olmayaraq dövlət qulluğunda çalışıblar. Azərbaycanın ikinci prezidenti Əbülfəz Elçibəyi də bu siyahıya aid etmək olar. İxtisasca şərqşünas olan Elçibəy "Tulunilər dövləti” adlı namizədlik dissertasiyasını müdafiə etməsinə baxmayaraq, sonradan prezident seçilib.
Modern.azsaytı vaxtilə yüksək postlarda çalışan həmin şəxslərin indiki fəaliyyətləri ilə bağlı araşdırmanı təqdim edir.

AXC hakimiyyəti zamanı təhsil naziri olmuş professorFirudun Cəlilovhazırda səhhətindəki problemlər səbəbindən heç bir ictimai fəaliyyətlə məşğul olmur. O bir neçə ay əvvəl Türkiyədə dövlət hesabına müalicə olunub. Elmi fəaliyyətini davam etdirən Firudin Cəlilov 9 cildlik "Azərbaycan türklərinin islamaqədərki tarixi” araşdırmaları üzərində çalışır. Bu araşdırmanın hələ ki üçü nəşr olunub. Vaxtilə Milli Məclisin deputatı və təhsil naziri olmuş alim türk xalqlarının tarixi, mifologiyası və etnoqrafiyası haqqında 200-dən artıq elmi məqalə və 20 kitab yazıb, əsərlərinin bir hissəsi xarici ölkələrdə çap olunub.

Digər sabiq təhsil naziriMisir Mərdanovötən il vəzifədən kənarlaşdırılıb. Riyaziyyatçı-professor hazırda Milli Elmlər Akademiyasının Mexanika-Riyaziyyat İnstitutunun direktoru vəzifəsində çalışır. Mərdanov nazir olmazdan öncə Bakı Dövlət Universitetinin rektoru işləyib.

Uzun müddət Azərbaycan Milli Elmlər Akademiyasının prezidenti olmuş akademikEldar Salayevinhazırkı fəaliyyəti yəqin ki, çoxlarına maraqlı olar. 1983-1997-ci illərdə ölkənin əsas elmi qurumuna rəhbərlik etmiş akademik hazırda Fizika İnstitutunda elmi fəaliyyətini davam etdirir. O, uzun müddətdir media ilə ünsiyyət qurmaqdan imtina edir.

AXC hakimiyyətdə xarici işlər naziri işləmişTofiq Qasımovda elmdən siyasətə gedənlərdəndir. Fizika elmləri doktoru Tofiq Qasımov hazırda İsveçdə mühacirət həyatı yaşayır. Azərbaycan mətbuatından qaçan keçmiş xarici işlər naziri hazırda elmi fəaliyyətini davam etdirir. O, Eynşteynin nisbilik nəzəriyyəsində boşluqların aradan qaldırılması istiqamətində elmi tədqiqatlar aparır.

Digər keçmiş xarici işlər naziriVilayət Quliyevbu vəzifəyə gəlməzdən əvvəl ədəbiyyatşünas araşdırmaçı alim kimi tanınıb. Ədəbiyyatşünaslıq və maarifçilik tarixinə aid dəyərli araşdırmalar aparan sabiq nazir hazırda yenidən bu fəaliyyətini davam etdirir. Bundan əlavə, 2004-cü ildə nazir vəzifəsi ilə vidalaşan Vilayət Quliyev əvvəlcə Polşada, hazırda isə Macarıstanda səfir kimi çalışır. O, diplomatik fəaliyyətlə yanaşı, elmi araşdırmalarını da davam etdirir.

Əli İnsanovda səhiyyə naziri təyin olunmazdan əvvəl elmi fəaliyyətilə diqqət çəkib. 2005-ci ildə həbs olunaraq vəzifəsindən çıxarılan keçmiş nazir tibb elmi sahəsində araşdırmalar aparıb. Bir müddət Vərəm İnstitutunun direktoru olmuş İnsanov sonradan AMEA-nın həqiqi üzvü seçilib. Həbs olunanda akademik fəxri adından məhrum edilib. Elm xadimi, eks-nazir hazırda həbsdədir. Deyilənə görə, o, həbsxanada da vərəm xəstəliklərinin müalicəsinə aid kitab yazıb. Əli İnsanov vaxtilə "İnsanovim” adlı dərman preparatı da kəşf etmiş və onun istehsalına nail olaraq, satışa çıxarmışdı.

1992-1993-cü illərdə Tələbə Qəbulu üzrə Dövlət Komissiyasına sədrlik etmiş Müsavat Partiyasının Məclis üzvüVurğun Əyyubda yüksək dövlət postuna elmi fəaliyyətdən sonra gəlib. Filologiya elmləri namizədi olan Vurğun Əyyub uzun müddət Müsavat başqanının birinci müavini postnu tutub. O, yenə də elmi fəaliyyətə qayıdıb və Xəzər Universitetində kafedra müdiridir.

Bir müddət prezidentin müşaviri vəzifəsində çalışmış professorQabil Hüseynlibu gün də müstəqil politoloji fəaliyyətlə yanaşı, elmi fəaliyyətini də davam etdirir. Uzun müddət Azərbaycan Texniki Universitetinin sosiologiya və fəlsəfə kafedrasının müdiri vəzfəsində çalışan Hüseynli hazırda həmin kafedranın professorudur. O, sufizm tarixi istiqamətində elmi araşdırmalar da aparır.

Keçmiş baş nazirPənah Hüseyndə elmi fəaliyyətlə məşğul olub, yüksək vəzifəyə gələnlərin siyahısındadır. Azərbaycan Milli Elmlər Akademiyasının Fəlsəfə və Hüquq İnstitutunun əməkdaşı olan sabiq baş nazir fəlsəfə istiqamətində monoqrafiyanın müəllifidir. Pənah Hüseyn indi elmi fəaliyyətlə məşğul olmur. 2005-2010-cu illərdə deputat olmuş keçmiş baş nazir Azərbaycan Xalq Partiyasının sədridir.

Azərbaycan Mərkəzi Seçki Komissiyası (MSK) "Seçkilər” İnformasiya Mərkəzinin sabiq rəhbəriİqbal Babayevdə elm sahəsində ad almış məmurlardandı. 2000-2008-ci illərdə MSK nəzdindəki "Seçkilər” İnformasiya Mərkəzinin direktoru vəzifəsində işləmiş İ.Babayev 2008-ci ilin aprelində şəxsi işlərini əsas gətirərək istefa vermişdi. O zaman Babayevin istefası mətbuatda müxtəlif cür yozularaq onun hətta ölkə rəhbərliyi tərəfindən işdən çıxarıldığı qeyd olunmuşdu.
"Seçkilər” İnformasiya Mərkəzinin rəhbərliyindən istefa verəndən sonra bir müddət qeyri-rəsmi işdə çalışan İqbal Babayev sonradan Dövlət Gömrük Komitəsində yeni vəzifəyə təyinat aldı.
İ.Babayev hazırda Dövlət Gömrük Komitəsinin Statistika və İnformasiya Texnologiyaları Baş İdarəsinin rəisi vəzifəsində işləyir.
İ.Babayev 1986-ci ildə Kiyev İnşaat və Memarlıq Milli Universitetinin Avtomatlaşdırma və informasiya texnologiyaları fakültəsini bitirib. 1991-ci ildə Azərbaycan İnşaat və Memarlıq Universitetində, assistent, baş müəllim və dosent vəzifələrində işləyib.
1992-2000 illərdə Tələbə Qəbulu üzrə Dövlət Komissiyasında şöbə müdiri postunu tutub.
Seçki texnologiyaları üzrə ixtiraçı olan İ.Babayev "Seçkilər - informasiya texnologiyaları güzgüsüundə” kitabının müəllifidir.
Texnika elmləri doktoru olan İqbal babayev 6 monoqrafiyanın və 100-ə yaxın elmi məqalənin müəllifidir. Dövlət Gömrük Komitəsində vəzifə tutandan sonra gömrük xidməti polkovniki rütbəsi alıb.

Sabiq maliyyə naziriƏvəz Ələkbərovelmi fəaliyyətini davam etdirən eks-məmurlardandır. 1991-ci ilin dekabrından 1992-ci ilin oktyabrınadək Azərbaycan Respublikası Pensiya Fondu idarə heyətinin sədri işləyib. 1993-cü ildə Azərbaycanda hakimiyyət dəyişikliyi baş verəndə və Heydər Əliyev hakimiyyətə gələndə Ə.Ələkbərov Azərbaycan Respublikası Dövlət Sosial Müdafiə Fondunun sədri vəzifəsində işləyirdi. Hakimiyyət dəyişikliyi ondan yan keçdi və Əvəz Ələkbərov Heydər Əliyevin komandasına daxil olaraq 1999-cu ilə kimi Dövlət Sosial Müdafiə Fondunun sədri postunda qaldı.
O, ilk sosial sığorta haqqında qanunun müəlliflərindən biridir. 1999-cu ilin iyulunda mərhum prezident onu maliyyə naziri vəzifəsinə təyin etdi. Ə.Ələkbərov bu vəzifədə 2006-cı ilin aprelinə qədər çalışdı. Lakin yeni prezident İlham Əliyevin komandasında möhkəmlənə bilmədi və vəzifəsini itirdi.
İqtisad elmləri doktoru Ə.Ələkbərovun hazırda elmlə məşğul olduğu bildirilir.