Sumqayıt gözəl şəhərdir, bunu danmaq olmaz. Amma bizim onu daha da gözəlləşdirmək, abadlaşdırmaq üçün daha çox imkan və potensialımız var. Sumqayıt heç kimin və heç nəyin qarşısında boyun əymir, aciz deyil, hətta 1988-ci ilin təxribatından da üzüağ, alnıaçıq çıxdı. Amma uzun illərdir ki, şəhərimiz bir şeylə bacarmır - yağıntıyla. Daha dəqiq, bu – payızın yağışları, qışın qarıdır. Hələlik payızın son ayını yaşayırıq, Allah qışın qarından qorusun.

Bu günlərdə ölkəmizin bir çox hissələrinə, eyni zamanda Sumqayıta elə də güclü olmayan yağış yağdı. Dərhal əvvəlki illərdəki kimi küçələr, yollarda hərəkət edən maşınlar təkərlərinin ortasına, bəzi məqamlarda isə yuxarısınadək suyun altında qaldı. İnsanlar küçə və yollardan keçməkçün böyük çətinliklərlə üzləşdilər.

Sual: Yəni bu qədərmi çətindir şəhərin yol-kanalizasiya sistemini düzəltmək?!

Təklif: Bu, çətindirsə, yaxşı olardı ki, hər küçənin və yolun kənarında kiçik qayıqlar, yaxud iriölçülü qaloşlar, çəkmələr qoyulsun.

Şəhərin əsas hissələrini hər birimiz gördük. Amma gözdən, könüldən nisbətən uzaq yerlərimiz də var axı. Bunu isə biz sizə göstərəcəyik. Yağışdan sonra fotoreportyorumuz yollandı Kimyaçılar qəsəbəsi və Xəzər Bağları adlanan əraziyə. Bir onu deyə bilərik ki, əməkdaşımız marşrut avtobusundan güclə düşüb minib. Xülasə, mərkəzi küçələrimiz su ilə, nisbətən kənar yerlər palçıqla dolu...

Danışdıqlarımız bu qədər, indi isə əvəzimizə fotolar "danışacaq”.

Elnur və Kamran

Xeberle.com