Noyabrın 11-də Sumqayıt şəhər məktəblərinin X-XI sinif şagirdləri arasında "Konstitusiya və biz" adlı test-müsabiqəsi keçirilib. Tədbir Sumqayıt şəhər İdman və Gənclər Baş İdarəsinin və şəhər təhsil şöbəsinin birgə təşkilatçılığı ilə reallaşıb.
Ənənəvi olaraq hər il keçirilən tədbir 12 noyabr - Konstitusiya Gününə həsr olunub.
Gənclərlə iş sektorunun baş məsləhətçisi Ceyhun Hüseynov AzərTAc-a bildirib ki, şagirdlər təqdim edilmiş 25 sualı qırx beş dəqiqə müddətində cavablandırıblar. Mütəxəssislərdən ibarət münsiflər heyətinin qərarına əsasən 10 nömrəli tam orta məktəbin 11-ci sinif şagirdi Səadət Həsənova birinci yerə layiq görülüb. Şəhər 22 nömrəli məktəbin 11-ci sinif şagirdi Məhəmməd Əbdüləzizov və gimnaziyanın 10-cu sinif şagirdi Könül Mehdiyeva ikinci, 35 nömrəli orta məktəbin 10-cu sinif şagirdi Nicat Adıgözəlov, 38 nömrəli orta məktəbin 11-ci sinif şagirdi Salman Nəbiyev və 2 nömrəli orta məktəbin 11-ci sinif şagirdi Tural Bədəlov isə III yerə layiq görülüblər.
Qaliblərə fəxri fərman və hədiyyələri təqdim olunub.
Ümumilikdə isə müsabiqənin bütün iştirakçılarına Azərbaycan Respublikasının Konstitusiyası hədiyyə edilib.