Ötən gün xəbər saytlarında Sumqayıtın 10-cu mikrorayon ərazisində 24 saylı orta məktəbin qarşısında böyük bir meydançanın hasarlanması haqqında mikrorayon sakinlərinin şikayətlərindən bəhs edilib. Xəbərdə ərazinin uşaq meydançası, avtomobil dayanacağı olduğu və 24 saylı məktəbin qarşısında yerləşdiyi bildirilirdi.

Məsələni araşdırmaq üçün əraziyə baxış keçirdik. Ərazidə vaxtilə hansısa tikinti şirkəti tərəfindən uşaq meydançasının saldınığını öyrəndik. Amma gördüyümüz yerdə uşaq meydançası və stadiondan əsər-əlamət belə yox idi.

24 saylı orta məktəbin direktoru Səadət Həmidova yayılan məlumata belə münasibət bildirdi: "Bu meydança məktəbin qarşısında yerləşmir. Məktəbin ətrafı hasarla örtülüb və meydança hasardan nə qədər aralı məsafədə yerləşir. 24 və 28 saylı məktəbin geniş təmir olunmuş stadionu var.”

Meydançanın nə üçün hasarlandığı haqda isə məlumat əldə edə bilmədik. Mikrorayon sakinləri isə, meydançada yaşayış binası tikiləcəyini güman edirlər.

Aytən Əli
Xeberle.com