Sumqayıtın deputatı Musa Qasımlıdan bəzi jurnalistlərə ETİRAZ: "Kimə ziyan vurduğunuzun fərqindəsinizmi?” yazısına tanınmış sumqayıtlı jurnalist, "Bakinets” qəzetinin sabiq baş redaktoru, Osman Mirzəyev adına Respublika mükafatı laureatı Rəhman Orxandan cavab gəlib.

Xeberle.com cavabı olduğu kimi diqqətinizə çatdırır:

 Görkəmli tarixçi alimimiz, hörmətli deputatımız çox mühüm məqamlara toxunaraq, bəzi mətbuat nümayəndələrinə haqlı iradlarını bildirmişdir. Bütövlükdə götürüldükdə onunla, şübhəsiz ki, razıyam, ancaq tam yox. Musa müəllim təklif edir ki, Ermənistan vertolyotu (mən bilərəkdən "helikopter" yazmıram. Axı, necə olur ki, yüzlərlə latın, ingilis, yunan, fransız, alman mənşəli lampa, radio, televizor, traktor, ekskavator, trolleybus, kosmos sözlərini, hətta təmiz rus sözlərini, o cümlədən "samovar”, maşın, vedrə və s. sözləri dilimizdə işlədirik, lakin diləyatımlı "vertolyot” sözünü guya rus sözündən imtina olaraq dilimizə yatmayan, yabançı olan "helikopter”lə əvəz edirik? Niyə?): "Təcavüzkar Ermənistan ordusu tərəfindən işğal edilmiş Azərbaycanın Ağdam rayonunda təxribat törədərək, təmas xəttindəki mövqelərimizə hücuma cəhd göstərən düşmən helikopteri hərbçilərimiz tərəfindən vurulmuşdur. İşğalçı ordunun üç hərbçisi məhv edilmişdir”. Bu hissəni oxuduqda istər-istəməz duruxub qalırsan. Necə yəni, "... işğal edilmiş Azərbaycanın Ağdam rayonunda...”

Allah eləməsin ki, Azərbaycan nə vaxtsa bir də işğal edilsin. Ancaq hörmətli professorumuz jurnalistlərimizə həqiqətən düzgün olaraq tövsiyə verərkən, belə bir ciddi ifadə səhvinə yol verməməli idi. Əslində, düzgün olaraq deyilməliydi ki, "... Azərbaycanın işğal edilmiş Ağdam rayonunda...” Çox təəssüf ki, orijinal düşüncə tərzinə, mühakimə və mülahizələrinə görə son zamanlar daha çox hörmət bəslədiyim Musa müəllim də həm bəzi jurnalistlərimizin, həm də alimlərimizin və, təəccüblü görünsə belə, bəzi filoloq və dilçilərimizin mahiyyətinə varmaq istəmədikləri yanlışlığa, səhvə yol vermişdir. Mənsubiyyət bildirən bu və ya digər ifadələrdə analoji səhvlər, heyf ki, son zamanlar tez-tez müşahidə olunur. Təəssüf ki, bu cür yanlışlığa hətta mühüm dövlət idarələrinin adlarında da rast gəlinir və dilçilərimiz, o cümlədən hörmətli Musa müəllim belə bir ciddi səhvin aradan qaldırılmasının fərqində olmayıb.
Baxın, Bizdə Daxili İşlər Nazirliyinin "Baş Mütəşəkkil Cinayətkarlıqla Mübarizə İdarəsi” adlanan çox ciddi, mühüm bir idarəsi var. Nazirliyin başqa bir mühüm idarəsi də vardır ki, bu da "Banditizmə və Terrorizmə qarşı Mübarizə Baş İdarəsi” adlanır. Söz yox, hər iki İdarə dövlətimizin mənafeyinin müdafiəsi və xalqımızın hüquqlarının qorunması sahəsində son zamanlar həqiqətən çoxşaxəli və çox effektiv fəaliyyət göstərirlər. Buna görə nazirliyə də, həmin idarələrə də həm jurnalist, həm də bir vətəndaş kimi minnətdarlığımı bildirirəm.

Ancaq söhbət onlara yox, bilavasitə dilçilərimizə, filoloqlarımıza aid başqa bir məqamla bağlıdır. Belə ki, Banditizmə və Terrorizmə qarşı Mübarizə Baş İdarəsi dilçilik baxımından tamamilə düzgün adlandırılıb. Bəs o biri İdarə necə? Baş Mütəşəkkil Cinayətkarlıqla Mübarizə İdarəsi. Necə başa düşülür? Belə çıxır ki, guya "Baş Mütəşəkkil Cinayətkarlıq” varmış. Əslində isə, nazirliyin o biri İdarəsinin adında olduğu kimi "Baş” sözünü məhz İdarəyə aid edərək, həmin qurumu Mütəşəkkil Cinayətkarlıqla Mübarizə Baş İdarəsi və ya Mütəşəkkil Cinayətkarlığa qarşı Mübarizə Baş İdarəsi adlandırmaq daha düzgün olardı. (Görünür ki, kimsə rus dilindən tərcümə olaraq ifadənin əvvəlində işlədilən "Qlavnoye Upravleniye..." kimi "Baş” sözünü, dilimizin xüsusiyyətlərini nəzərə almadan Azərbaycan dilində də əvvəldə işlətməyi vacib hesab edib, lakin əbəs yerə...). Yəqin ki, hörmətli alimimiz mənim bu fikrimlə razılaşar. Adıçəkilən müvafiq İdarə də, yəqin ki, adının daha düzgün yazılmasına nail olacaqdır.

Bütünlükdə, əlbəttə, toxunduğu mühüm mövzu və ədəbi-stilistik məqamlara görə hörmətli Musa müəllimə təşəkkür etməyə dəyər.