Azərbaycan Respublikası Dövlət Neft Şirkətinin (ARDNŞ) "Azərikimya” İstehsalat Birliyində (İB) Dövlət bayrağı, Konstitusiya və Milli Dirçəliş günlərinə həsr olunmuş Breyn-rinq bilik yarışı keçirilib.
"Azərikimya” İB-nin mətbuat xidmətindən AzərTAc-a bildiriblər ki, kimyaçıların da təmsil olunduğu yarışa M. V. Lomonosov adına Moskva Dövlət Universitetinin Bakı filialının, Bakı Ali Neft Məktəbinin, Sumqayıt Dövlət Universitetinin, Azərbaycan Müəllimlər İnstitutunun Sumqayıt filialının, Sumqayıt Dövlət Texniki Kollecinin, şəhər Təhsil şöbəsinin, KİV nümayəndələrinin, ARDNŞ-in Təlim, Tədris və Sertifikatlaşdırma İdarəsinin Sumqayıt Təlim-Tədris Mərkəzinin və digər müəssisələrin komandaları da daxil olmaqla 20 komanda qatılıb.
Yarış "Azərikimya” İB-nin təşkilatçılığı ilə keçirilib. Üç mərhələdən ibarət olmaqla dörd saata qədər davam edən bilik yarışmasının qalib komandaları müəyyənləşdirilib.
"Azərikimya” İB Müşahidə Şurasının sədri Muxtar Babayev bilik yarışmasında mükafata layiq yerlər tutmuş komandaların üzvlərini təbrik edib.
Sonda "Azərikimya” İstehsalat Birliyi Həmkarlar İttifaqı Komitəsi tərəfindən qalib komandalara diplomlar və pul mükafatları verilib.