Beynəlxalq Tolerantlıq Günü münasibətilə Sumqayıtda keçirilən "Mən fəxr edirəm ki, azərbaycanlıyam” mövzusunda "dəyirmi masa”da AMEA-nın Fəlsəfə və Hüquq İnstitutunun direktoru İlham Məmmədzadə deyib ki, sivilizasiyaların qovuşuğunda yerləşən Azərbaycanın zəngin mədəni-mənəvi irsə və tolerantlıq ənənələrinə malik olması dünyada etiraf edilən həqiqətlərdəndir. Mövcud milli-mədəni müxtəliflik və etnik-dini dözümlülük mühiti ölkəmizi çoxmillətli, çoxkonfessiyalı diyar kimi dünya miqyasında mədəniyyətlərarası dialoqun bənzərsiz məkanı edib.
Tədbirdə çıxış edən Sumqayıt Şəhər İcra Hakimiyyəti başçısının müavini Elgin Həbibullayev, Beynəlxalq Multikulturalizm Mərkəzinin nümayəndəsi Taleh Əhmədov, rus icmasının şəhər bölməsinin rəhbəri Olqa İslamova və başqaları bildiriblər ki, ulu öndər Heydər Əliyev tərəfindən müəyyən edilmiş inkişaf strategiyasının Prezident İlham Əliyevin rəhbərliyi ilə uğurla icrası Azərbaycanda demokratik, hüquqi və dünyəvi dövlət quruculuğunu şərtləndirməklə ictimai-siyasi həyatın bütün istiqamətlərində böyük nailiyyətlərin əldə olunmasına əlverişli zəmin yaradıb. Görülmüş kompleks tədbirlər nəticəsində respublika bir çox sahələr üzrə yüksək potensial inkişafa malik bir dövlət kimi dünyanın qabaqcıl ölkələri arasında özünə layiqli yer tutub. Diqqətə çatdırılıb ki, ölkəmizdə insan hüquq və azadlıqları, o cümlədən vicdan və dini etiqad azadlığının qorunması beynəlxalq hüquq normalarına tam cavab verir.
"Dəyirmi masa”da dövlət və dini qurumlar arasındakı münasibətlər haqqında da söhbət aparılıb, milli mənəvi dəyərlərimiz sırasında xüsusi yer tutan tolerantlığın qorunub saxlanması yüksək qiymətləndirilib.(azertag.com)