Prezidentin rəsmi saytında yerləşdirilmiş məktublarda Prezident İlham Əliyevin Sumqayıta olan diqqət və qayğısından, şəhərimizin gündən-günə gözəlləşməsindən, şəhərdə həyata keçirilən abadlıq-quruculuq işlərindən razılıq ifadə olunur.

Məktublardan bir neçəsinin mətnini təqdim edirik:

Sumqayıtdan sahibkar Nizami İsgəndərovdan:

Hörmətli cənab Prezident.

Sizin Azərbaycana rəhbərlik etdiyiniz 16 il ərzində dövlət müstəqilliyimizin dayanıqlı və möhkəm olması, xalqımızın rifah halının yüksəldilməsi üçün misilsiz işlər görməyiniz bütün sahələrdə özünü aydın şəkildə göstərməkdədir. Vicdanına sığınan heç bir kəs bunları inkar edə bilməz. Son günlər ölkəmizdə apardığınız islahatlar və məmurlar qarşısında qoyduğunuz prinsipial tapşırıqlar xalqın Sizə etimadını və inamını daha da artırıb, cəmiyyətimizə, insanlara yeni nəfəs verib.

Sahibkarlara dəstəklə bağlı son çıxışlarınız bizi ruhlandırır və fəaliyyətimizi genişləndirmək üçün motivasiyamızı artırır. Yüksək vəzifəli məmurlara ciddi tapşırıqlar verməyinizi, bəzilərinə isə xəbərdarlıq etməyinizi maliyyə və iqtisadi şəffaflığın təminatına səbəb olan amil kimi görür və yüksək qiymətləndiririk. Təbii ki, bu da Sizin ölkə iqtisadiyatının inkişaf etdirilməsində və rəqabətədavamlılığın yüksəldilməsində, ümumi daxili məhsulun artırılmasında, xalqın maddi rifah halının yaxşılaşdırılmasında nə qədər maraqlı, nə qədər prinsipial olduğunuzu göstərir.

Hörmətli cənab Prezident, dövlətimizin inkişafı və xalqımızın parlaq gələcəyi üçün hər bir məsələyə həssas yanaşmağınız, ölkəmizdə kiçik və orta biznesin irəli aparılması, azad rəqabət mühitinin təmin edilməsi, islahatların həyata keçirilməsi üçün perspektivli və bilikli gəncləri mühüm dövlət postlarına təyin etməyiniz biz sahibkarların sabaha ümidini artırır ki, bu da özlüyündə müsbət tendensiya hesab olunur. Heç şübhəsiz ki, bu işlə dövlətlə sahibkarlar arasında sıx dostluq bağları formalaşır.

Bütün bunlara görə "Sumqayıt Ticarət Mərkəzi” ASC-nin rəhbərliyinin və ticarət mərkəzimizdə fəaliyyət göstərən 440 sahibkar adından Sizə minnətdarlığımızı bildiririk. Uca Tanrı hər zaman yardımçınız olsun.

___________________________________________________________________________________________________________________________________

Sumqayıt Şəhər Gənclər və İdman baş idarəsinin rəisi, Hümbətov Elgündən:

Möhtərəm cənab Prezident.

Xalqımızın ümummilli lideri Heydər Əliyevin başlatdığı inkişaf strategiyasının Sizin tərəfinizdən uğurla davam etdirilməsinin məntiqi nəticəsi olaraq ölkəmiz regionun lider dövlətinə çevrilib. Dövlətimizin iqtisadi qüdrətinin ildən-ilə artması bütün sahələrdə olduğu kimi, idmanın da tərəqqisinə müsbət təsirini göstərib.

Respublikamızın bütün bölgələrində olduğu kimi, Sumqayıt şəhərində də Olimpiya Kompleksi, müasir idman qurğuları tikilib istifadəyə verilib, maddi-texniki baza möhkəmləndirilib.

Bu qayğının davamı olaraq Mehdi Hüseynzadə adına Sumqayıt şəhər stadionunun yenidən qurulması məqsədilə imzaladığınız müvafiq Sərəncam şəhər ictimaiyyətinin, xüsusilə idmançıların sevincinə səbəb oldu. Göstərdiyiniz bu diqqət və qayğıya görə Sumqayıtın gəncləri və idman ictimaiyyəti adından Sizə dərin təşəkkürümüzü bildirir, çiçəklənən respublikamızın inkişafında yeni-yeni uğurlar arzu edirik.

Xatirə Cəfərova və başqalarından:

Möhtərəm cənab Prezident.

Sumqayıtın müasir və inkişaf etmiş sənaye şəhərinə çevrilməsi istiqamətində qazandığı uğurlar ulu öndər Heydər Əliyevin adı ilə bağlıdır. Sizin diqqət və qayğınız nəticəsində şəhərimizdə müasir texnologiyalar əsasında, zamanın tələblərinə uyğun qurulmuş yeni-yeni istehsal sahələri istifadəyə verilir, doğma şəhərimizin tarixinin şanlı səhifələri yazılır. İri müəssisələrlə yanaşı, elm, mədəniyyət, səhiyyə, təhsil, idman mərkəzləri də şəhərimizin inkişafına xidmət edir.

Sumqayıtda aparılan böyük quruculuq işləri, irimiqyaslı layihələrin həyata keçirilməsi, yeni sənaye müəssisələrinin inşa olunması, ümumilikdə, Sumqayıtın sürətli inkişafı Sizin mütəmadi diqqətiniz sayəsində mümkün olub. Sizin Sərəncamınıza əsasən, "ASAN xidmət” mərkəzi üçün tikiləcək yeni bina bir çox sahələrin daha rahat və müasir şəraitdə fəaliyyət göstərməsinə imkan yaradacaq.

Cənab Prezident, Sumqayıta 24-cü səfəriniz və şəhərimizin 70 illik yubileyində iştirakınız hamımızın qəlbini fərəhləndirdi, bayramımıza bayram qatdı, sevincimizi artırdı. Təhsil, tibb, idman sahələrində çalışanların, şəhərimizin quruculuğunda iştirak edənlərin təltifi ilə bağlı sərəncamlarınız isə bizə ən böyük hədiyyə və gələcəkdə daha yaxşı işləməyimiz üçün stimul oldu.

Sumqayıta göstərdiyiniz diqqət və qayğıya görə şəhərimizdə fəaliyyət göstərən əmək kollektivləri və sakinlər adından Sizə dərin təşəkkürümüzü bildiririk. Əminik ki, Sumqayıtın açılan hər səhəri əvvəlkindən daha işıqlı olacaq, şəhərimiz dünyanın ən gözəl guşələrindən birinə çevriləcəkdir.

___________________________________________________________________________________________________________________________________

Bəxtiyar Bayramovdan:

Hörmətli cənab Prezident.

Ümummilli liderimiz Heydər Əliyevin bizə əmanət qoyduğu yeni, müasir Azərbaycan dövləti Sizin rəhbərliyiniz altında özünün yeni inkişaf mərhələsini yaşayır. Ölkənin hər bir guşəsində böyük quruculuq və abadlaşdırılma işləri həyata keçirilir.

Bu baxımdan doğma Sumqayıtımızda da qısa bir müddətdə reallaşan, şəhərimizin simasını əhəmiyyətli şəkildə dəyişən böyük bir inkişafın şahidiyik. Bu inkişaf və tərəqqinin əsas təməl gücü həm Ulu Öndərin, həm də Sizin şəhərimizə olan xüsusi qayğınız və diqqətinizdir. Şəhərimizə etdiyiniz səfərləriniz, şəhərimizlə bağlı sərəncamlarınız, şəhərin inkişafı ilə bağlı tövsiyələriniz bu yeniləşməni qaçılmaz edir.

Cənab Prezident,

Bu günlərdə Sumqayıtın şəhər statusu almasının 70 illiyi münasibətilə şəhərimizə növbəti səfəriniz, yeni yaradılan obyektlərin açılışında iştirakınız, abadlaşdırma və quruculuq işləri üçün əlavə maliyyə vəsaiti ayırmağınız, müxtəlif sahələrdə çalışan əmək adamlarını, ziyalıları fəxri adlarla, mükafatlarla təltif etməyiniz biz sumqayıtlılara qayğının bariz nümunəsidir. Bütün bunlar bizi bir daha ürəkdən çalışmağa, Sizin etimadınızı doğrultmağa həvəsləndirir. Verdiyiniz dəyərə, qayğıya görə şəhər sakinləri adından Sizə təşəkkürümüzü bildiririk.

___________________________________________________________________________________________________________________________________

Ülviyyə Əhmədovadan:

Hörmətli cənab Prezident.

Doğma şəhərimiz şərəfli inkişaf tarixi yaşayıb, 70 illik yubileyini qeyd edir. Respublikamızın bütün bölgələrdə olduğu kimi, şəhərimizdə də böyük abadlıq və quruculuq işləri aparılır.

Sizin qayğınız və diqqətiniz nəticəsində şəhərimiz gündən-günə abadlaşır, gözəlləşir, bir çox yeni sosial obyektlər tikilib, yeni iş yerləri açılıb. İnsanların rifah halı yaxşılaşıb. Sumqayıt və sumqayıtlılara göstərilən bu diqqət və qayğıya görə Sizə kollektivimiz adından dərin minnətdarlığımızı bildiririk.

Qəribə Babayevadan:

Hörmətli cənab Prezident.

Sumqayıtın 70 illiyi münasibətilə və şəhərin sosial və iqtisadi inkişafında xidmətlərimə görə Sizin tərəfinizdən "Tərəqqi” medalı ilə təltif olunmağımdan çox böyük qürur və fərəh hissi duydum.

Ölkəmizin sosial-iqtisadi və mədəni həyatının yüksəldilməsində əməyi keçən şəxslərin təltif edilməsi artıq ənənə halını alıb. Müstəqillik illərində bu ənənənin təməli ümummilli liderimiz Heydər Əliyev tərəfindən qoyulub və hazırda Sizin tərəfindən layiqincə davam etdirilir. Sizin apardığınız uğurlu siyasətin məntiqi nəticəsi olaraq son illər ölkəmizdə qazanılan iqtisadi və sosial nailiyyətlər Sumqayıt şəhərinin timsalında əyani şəkildə görünür.

Şəhərimizə səfərinizdən sonra imzaladığınız sərəncamlarla verdiyiniz fəxri adlar, orden və medallar Sumqayıt sakinlərinə və əməkçilərinə göstərdiyiniz böyük etimad və qayğının bariz nümunəsidir. Bizim qarşımızda duran əsas vəzifə isə bu etimadı əməli işimizlə doğrultmaqdır.