Şirkət rəhbəri yolların təmir olunmamasından şikayətçidir: "Bu yola mən necə təzə avtobuslar gətirim?!”

Təəssüf ki, şəhərimizin yaralı yerlərindən biri onun nəqliyyat sistemi ilə bağlıdır. Marşrutların necə gəldi idarə olunması, sürücülərin kobud davranışları ilə problemlər məhdudlaşmır. 2, 4, 5, 6, 7, 8, 10, 11, 25, 30, 40, 42 və s. ictimai nəqliyyat marşurutlarında, əfsuslar ki, xeyli sayda köhnə avtobuslar, xüsusilə "RAF” markalı avtobuslar sumqayıtlılara xidmət göstərir.

Son illər ərzində bəzi marşurutlar ləğv olunub, bəzilərinə isə bir-birilərinə birləşdirilib. Bu istiqamətdə bir sıra yeniliklər baş verib.

Təəssüflər olsun ki, bu marşurut xətlərindən bəziləri hələ də əl gəzdirilməyib, köhnə, sınıq-salxaq avtobuslar bizi ora-bura daşımaqda davam edir. Bu da sərnişinlərin həyatı üçün həm təhlükə, həm də narahatlıq yaradır. Çox da böyük olmayan bu marşurutlarda əsasən səhər və axşam saatlarında sərnişin sıxlığı müşahidə olunur. İnsanlar ayaqüstə, diskomfort şəkildə getdikləri mənzilə çatırlar. Bu da sürücü və sərnişinlər arasında mübahisələrə, əsəb gərginliklərinə səbəb olur.

Avtobusda sərnişinlərin ayaqüstə dayanmalarına baxmayaraq sürücünün dayanacaqda və dayanacaqdan kənar saxlayıb sərnişin götürməyi, kiçik marşurutda daha çox sıxlığa səbəb olur. Belə marşurutlara 2,4,6,8,11,25,40 nömrəli xətt ilə hərəkət edən nəqliyyat vasitələrini misal gətirmək olar. 2,6,8 nömrəli xətt ilə hərəkət edən marşurutlar üzrə avtobusların bəziləri yenilənib, bəziləri isə hələ də çox da böyük olmayan kiçik marşurutlarla əhaliyə xidmət göstərir.

Məsələyə aydınlıq gətirmək üçünSumqayıt şəhər 8 saylı Sumqayıt Regional MMC- nin rəisi Mirqamət Şıxəliyevilə əlaqə saxladıq. "Şəhərin nəqliyyat sistemindəki vəziyyəti necə dəyərləndirdiyi, hazırkı durumun onları qane edib etmədiyi” ilə bağlı sualımıza cavab verərkən İdarə rəisi yaxın illərdə şəhərdəki yol infrastrukturunda xeyli inkişaf olduğunu önə çəkdi: "Bu irəliləyişi gözlə görməmək mümkün deyil. Şəhərimizdə yolların əksəriyyəti abadlaşıb. Köhnə avtobusların ilin sonuna kimi yenilənməsi planlaşdırılır. Bunun üçün maddi vəsait lazımdır və yenilənmə ilin sonuna kimi həll olunacaq. Köhnə "RAF”lar yenilənəcək”.

Əsasən şəhərdənkənar Saray qəsəbəsi, Qurd dərəsi, Yaşma bağları üzrə hərəkət edən 12, 39, 10 nömrəli marşurutların yenilənməmiş olduğunu deyən M.Şıxəliyev şəhər içində bu problemin olmadığını vurğuladı.

"Köhnə avtobuslar insan həyatı üçün təhlükəlidirmi və avtobuslar daimi olaraq yoxlanılırmı?” sualımıza İdarə rəisinin cavabı bu cür oldu: "Bəli, əlbəttə, təhlükəlidir - ancaq bütün avtobuslar rübdə bir dəfə texniki müayinədən keçir. Vaxtı - vaxtında yoxlanılır. Hər sabah yola düşməmişdən əvvəl yoxlanılır, sonra sərnişinlərin ixtiyarına buraxılır. Texniki nasazlıqlar olmasın deyə əvvəlcədən tədbirlər görülür”.

Məlum olduğu kimi, şəhər nəqliyyat xətlərinə müxtəlif şirkətlər xidmət göstərir. 8 nömrəli marşurutun bağlı olduğu"Transyol” MMCşirkəti ilə əlaqə yaratdıq. 8 nömrəli marşurutun təsisçisiArzu Qəybullayevyenilənmənin heç bir mənası olmadığını, avtomobil yollarının qəzalı vəziyyətdə olduğunu bildirdi. O, bildirdi ki, onun şirkətinin xidmət göstərdiyi 8 nömrəli marşuruta 10 avtobus gətirilib ancaq yolların qəzalı, palçıqlı olmağı avtobusları sıradan çıxarır: "Bu yola mən necə təzə avtobuslar gətirim?! Hər səhər marşurutlar yuyulub işə çıxır, lakin çıxan kimi bütünlüklə palçıq olur. Yollar maşınları dağıdıb tökür. Azərbaycan prospekti çox qəzalı vəziyyətdədir. Hara şikayət edirik, deyirlər bizlik deyil, Sumqayıt şəhər İcra Hakimiyyətinə məktubla müraciət etmişik, deyirlər bizlik deyil."Azəryolservis”ə yazmışıq deyiblər bizlik deyil. Yollar düzəlsin ki, biz də yeni avtobuslar gətirək”.

Ümid edirik ki, həm yol, həm də ictimai nəqliyyat məsələsi tezliklə öz həllini tapacaq, sürücülər və sərnişinlərin problemlərinə son qoyulacaq. Hələ Avropanın kondisionerli avtobuslarından danışmırıq.
Aynur Kərimova ,168saat.com